រថយន្ត prius បុករះរបាំងពុះចែកទ្រូងផ្លូវ និងបង្គោលភ្លើងខ្ទេចមួយកំណាត់មុខ

រថយន្ត toyota prius មួយគ្រឿងសង្ស័យម្ចាស់ស្រវឹង បើកបុករបាំងជ័រពុះចែកទ្រូងផ្លូវប៉ើងរប៉ាត់រប៉ាយ៦កង់ និងវៀចជាច្រើនកង់ រួមនិងបង្គោលភ្លើងមួយដើមបាក់រាបដល់ដី ចំណែករថយន្តខ្ទេចមួយចំហៀងទៅមុខលែងរួច។

ហេតុការណ៍នេះកើតឡើងកាលពីវេលាម៉ោង២និង៣០នាទីរំលងអាធ្រាត្រឈានចូលថ្ងៃទី២៩ ខែមេសា ឆ្នាំ២០២២ នៅតាមបណ្ដោយផ្លូវសហព័ន្ធរុស្ស៊ី ក្បែរប៉ុស្តិ៍នគរបាលរដ្ឋបាលកាកាបទី១ ក្នុងសង្កាត់កាកាបទី១ ខណ្ឌពោធិ៍សែនជ័យរាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឱ្យដឹងថា មុនកើតហេតុគេឃើញរថយន្តtoyota prius មួយគ្រឿងពណ៌ក្រហមពាក់ស្លាកលេខភ្នំពេញ2BD-6502ធ្វើដំណើរទិសដៅពីកើតទៅលិចក្នុងល្បឿនលឿនលុះមកដល់ចំណុចកើតហេតុខាងលើសង្ស័យតែម្ចាស់ស្រវឹងបានរេចង្កូតទៅបុករបាំងជ័រពុះចែកទ្រូងផ្លូវប៉ើងរប៉ាត់រប៉ាយអស់៦កង់ និងវៀចជាច្រើនកង់រួមទាំងបង្គោលភ្លើងមួយដើមទៀតបាក់រាបដល់ដី ចំណែករថយន្តបង្កខ្ទេចមួយចំហៀងមុខទៅលែងរួច។ ភ្លាមនោះគេឃើញអ្នកបើកបរបានចុះពីលើរថយន្តគេចខ្លួនចេញពីកន្លែងកើតហេតុបាត់ស្រមោល។

ក្រោយកើតហេតុសមត្ថកិច្ចមូលដ្ឋានបានទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ រង់ចាំម្ចាស់ចូលខ្លួនមកដោះស្រាយតាមផ្លូវច្បាប់៕

អត្ថបទ៖ សុខា