ចរាចរណ៏

រថយន្តស៊ីទែនដឹកស៊ីម៉ង់ងងុយដេកធ្លាក់ផ្លូវក្រឡាប់បះជើង សំណាងមិនមានគ្រោះថ្នាក់ដល់មនុស្ស

Published

1 month ago

February 3, 2021

បាត់ដំបង ៖ តាមមតិប្រជាពលរដ្ឋនៅកន្លែងកើតហេតុបានសន្និដ្ឋានថា ទំនងអ្នកបើកបរងងុយដេកបានបើកធ្លាក់ផ្លូវបណ្តាលឲ្យក្រឡាប់បះជើងឡើងលើ តែសំណាងល្អមិនបណ្តាលឲ្យមានគ្រោះថ្នាក់ដល់មនុស្ស ខណៈដែលម្ចាស់ផ្ទះមិនទាន់ក្រោកពីដេក។

សមត្ថកិច្ចបានឲ្យដឹងថា ហេតុការណ៍គ្រោះថ្នាក់ចរាចរណ៍បង្កដោយខ្លួនឯងខាងលើនេះបានកើតឡើងកាលពីវេលាម៉ោង០៣និង៤០នាទីទៀបភ្លឺ ឈានចូលថ្ងៃទី០៣ ខែកុម្ភៈ ឆ្នាំ២០២១នេះនៅលើកំណាត់ផ្លូវជាតិលេខ៥ ត្រង់ចំណុចខាងមុខផ្សារតាឌុក ស្ថិតក្នុងភូមិពពាល ខែឃុំអូរតាគីស្រុកថ្មគោល ខេត្តបាត់ដំបង។

រថយន្តដឹកស៊ីទែនស៊ីម៉ង់ត៍ ដែលក្រឡាប់ខាងលើជាប្រភេទរថយន្តធុនធំភ្លៅ៥បើកបរដោយបុរសឈ្មោះផា ង៉ា អាយុ២១ឆ្នាំ រស់នៅភូមិថ្មី ឃុំតាគ្រាម ស្រុកបាណន់ ខេត្តបាត់ដំបង។ តាមសម្តីប្រជាពលរដ្ឋ ដែលបានឃើញហេតុការណ៍បានប្រាប់ថា មុនកើតហេតុគេឃើញរថយន្តធុនធំនេះបានបើកបរក្នុងទិសដៅពីត្បូងទៅជើង(បាត់ដំបងបន្ទាយមានជ័យ)ក្នុងល្បឿនយ៉ាងលឿនលុះមកដល់ចំណុចកើតហេតុខាងលើទំនងអ្នកបើកបរងងុយដេកហើយងោក១ភាំង ក៏បានរ៉េចង្កូតធ្លាក់ផ្លូវបណ្តាលឲ្យក្រឡាប់ចូលប្រឡាយមុខផ្ទះប្រជាពលរដ្ឋតែម្តង ហើយមិនបណ្តាលឲ្យមាននរណាម្នាក់រងរបួសឡើយ។

ក្រោយពេលកើតហេតុសមត្ថកិច្ចមូលដ្ឋានចុះទៅពិនិត្យនិងបានទំនាក់ទំនងទៅម្ចាស់ក្រុមហ៊ុនរថយន្តខាងលើឲ្យចូលខ្លួនមកដោះស្រាយសំណង ឬ ជួសជុលក្នុងការខូចខាតប្រព័ន្ធលូខាងមុខផ្ទះរបស់បងប្អូនប្រជាពលរដ្ឋឡើងវិញ៕

ដោយ ៖ សៅ សារិទ្ធ