រយៈពេល ១ ឆ្នាំ អាវុធហត្ថខេត្តក្រចេះបង្ក្រាប​បទល្មើស និង​ឃាត់ខ្លួនមនុស្ស​ជាង​ ១០០ នាក់​បញ្ជូនទៅ​តុលាការ

បទល្មើសនិងមនុស្សចំនួន ១៤៤ នាក់ ក្នុងនោះមានស្រី ១៣ នាក់ ត្រូវបានកម្លាំងកងរាជអាវុធហត្ថខេត្តក្រចេះឃាត់ខ្លួនក្នុង​រយៈពេលមួយឆ្នាំ។ នេះបើ​យោងតាមរបាយការណ៍​របស់​កងរាជអាវុធហត្ថខេត្តក្រចេះ។

យោងតាមរបាយការណ៍របស់​កងរាជអាវុធហត្ថខេត្តក្រចេះ គិតចាប់ពីថ្ងៃទី២១ ខែវិច្ឆិកា ឆ្នាំ២០២៤ ដល់ថ្ងៃទី២៨ ខែ​វិច្ឆិកា ឆ្នាំ២០២៥ សមត្ថកិច្ច​បាន​បង្ក្រាបក្នុងនោះមានបទឧក្រិដ្ឋចំនួន ៤៥ លើក បទល្មើសមជ្ឈិមចំនួន ១៩ លើក និងសហការបង្ក្រាប ១ លើក (បទមជ្ឈិម)។

កម្លាំងជំនាញបានបញ្ជូនជនសង្ស័យទៅកាន់សាលាដំបូងខេត្តក្រចេះមានចំនួន ១០៦នាក់ ក្នុងនោះ ស្រី១១នាក់ និងវត្ថុតាងរួមមាន ៖ ម្សៅក្រាមសថ្លាសង្ស័យជាសារធាតុញៀនប្រភេទមេតំហ្វេតាមីន ចំនួន ៣០២កញ្ចប់ ស្មើនឹង ១៧៣១,៧៤​ក្រាម, ជញ្ជីងថ្លឹងសារធាតុញៀន ១៩គ្រឿង, ម៉ូតូ ៦៤គ្រឿង, ទូរស័ព្ទ ៨០គ្រឿង, កាំភ្លើងកែច្នៃ ២ដើម, កាំបិតផ្គាក់ ៣, ដាវ ៣, កាំបិតប៉័ងតោ ១, ពូថៅ២,នគ្រាប់ កាំភ្លើង១គ្រាប់ មិនស្គាល់ម៉ាក, និងវត្ថុតាងមួយចំនួនទៀត៕

អត្ថបទ៖ ប្រុញ វិធិន