ក្រុមហ៊ុន អូស៊ីអាយស៊ី របស់ កាណាឌីយ៉ា គ្រុប ទទួលបានការប្តេជ្ញាផ្តល់ហិរញ្ញប្បទានយុទ្ធសាស្ត្រចំនួន ១០០ លានដុល្លារពី DFC របស់សហរដ្ឋអាមេរិក សម្រាប់អាកាសយានដ្ឋានអន្តរជាតិតេជោ

ខែមិថុនា ឆ្នាំ 2026 ភ្នំពេញ – ក្រុមប្រឹក្សាភិបាលនៃសាជីវកម្មហិរញ្ញវត្ថុអភិវឌ្ឍន៍អន្តរជាតិ (DFC) របស់សហរដ្ឋអាមេរិកបានអនុម័តការផ្តល់ហិរញ្ញប្បទានចំនួន ១០០លានដុល្លារអាមេរិកសម្រាប់អាកាសយានដ្ឋានអន្តរជាតិតេជោដើម្បីគាំទ្រដល់ការពង្រីកហេដ្ឋារចនាសម្ព័ន្ធអាកាសចរណ៍របស់ប្រទេសកម្ពុជា។

កិច្ចព្រមព្រៀងនេះធ្វើឡើងបន្ទាប់ពីការត្រួតពិនិត្យផ្ទៀងផ្ទាត់ភាពត្រឹមត្រូវយ៉ាងហ្មត់ចត់អស់រយៈពេលជាងពីរឆ្នាំ រួមមានការវាយតម្លៃលទ្ធភាពគម្រោង បច្ចេកទេស ប្រតិបត្តិការ និងការវាយតម្លៃផលប៉ះពាល់បរិស្ថាន និងសង្គម (ESIA)។ ស្របតាមការអនុវត្តស្តង់ដារ ប្រតិបត្តិការនេះអាចនឹងឆ្លងកាត់ជំហានបន្ថែមមុនពេលការចាប់ផ្តើម និងការបិទបញ្ចប់ រួមទាំងដំណើរការជូនដំណឹងដល់សភាផងដែរ។

ការផ្តល់ហិរញ្ញប្បទាននេះតំណាងឱ្យការគាំទ្រយ៉ាងសំខាន់ដល់អាកាសយានដ្ឋានអន្តរជាតិតេជោ និងការទទួលស្គាល់ដល់ក្រុមហ៊ុន អូស៊ីអាយស៊ី (OCIC)ដែលជាសម្ព័ន្ធក្រុមហ៊ុនក្នុងស្រុក និងជាក្រុមហ៊ុនធំជាងគេមួយក្នុងចំណោមក្រុមអភិវឌ្ឍហេដ្ឋារចនាសម្ព័ន្ធនៅក្នុងប្រទេសកម្ពុជា។​

សមិទ្ធផលដ៏សំខាន់នេះបាន​កសាង​ឡើង​ពី​ការ​ចូលរួម​អស់​រយៈពេល​ជាច្រើន​ឆ្នាំ​របស់​ក្រុមហ៊ុន កាណាឌីយ៉ា គ្រុប (Canadia Group)និងក្រុមហ៊ុន អូស៊ីអាយស៊ី OCIC ជាមួយ​ស្ថាប័ន​អាមេរិក រួម​ទាំង​ស្ថានទូត​អាមេរិក សភាពាណិជ្ជកម្ម​អាមេរិក​ប្រចាំ​កម្ពុជា និង​ក្រុមហ៊ុន​អាមេរិក​ដូចជា General Electric, OTIS, Caterpillar, Ford និង Apple។ តាមរយៈ​គណៈប្រតិភូ​ធុរកិច្ច និង​ការសន្ទនា ក្រុមហ៊ុនមួយ​នេះ​កំពុង​ធ្វើការ​ដើម្បី​គាំទ្រ​ដល់​ការ​អភិវឌ្ឍ​ហេដ្ឋារចនាសម្ព័ន្ធ និង​ការ​តភ្ជាប់​របស់​កម្ពុជា។​

លោកអ្នកឧកញ៉ា បណ្ឌិត ពុង ឃាវសែ ប្រធានក្រុមប្រឹក្សាភិបាល OCIC បានមានប្រសាសន៍ថា៖ «យើងមានសេចក្តីសោមនស្សរីករាយក្នុងការស្វាគមន៍ DFC ក្នុងនាមជាដៃគូក្នុងការសាងសង់អាកាសយានដ្ឋានអន្តរជាតិតេជោ។ កិច្ចសហការនេះគឺជាការប្តេជ្ញាចិត្តរួមគ្នារវាងប្រទេសកម្ពុជា និងសហរដ្ឋអាមេរិក ឆ្ពោះទៅរកការអភិវឌ្ឍហេដ្ឋារចនាសម្ព័ន្ធ ដែលគាំទ្រដល់កំណើន និងបង្កើនការតភ្ជាប់ជាមួយតំបន់ និងពិភពលោក។»

នៅក្នុងសេចក្តីប្រកាសរបស់ខ្លួន DFC បានបញ្ជាក់ថា៖ «ការវិនិយោគនេះនឹងគាំទ្រដល់ការពង្រីកហេដ្ឋារចនាសម្ព័ន្ធអាកាសចរណ៍របស់ប្រទេសកម្ពុជា និងលើកកម្ពស់ឱកាសសេដ្ឋកិច្ចកាន់តែទូលំទូលាយសម្រាប់ពាណិជ្ជកម្ម កំណើនសេដ្ឋកិច្ច និងការអភិវឌ្ឍ។ កិច្ចព្រមព្រៀងនេះគូសបញ្ជាក់ពីតួនាទីរបស់ DFC ក្នុងនាមជាដៃគូដែលមានសមត្ថភាពប្រើប្រាស់ដើមទុន ជំនាញ និងនវានុវត្តន៍ ដើម្បីពង្រឹងហេដ្ឋារចនាសម្ព័ន្ធដ៏សំខាន់បំផុតមួយរបស់ប្រទេសកម្ពុជា។»​

តាមរយៈការនាំយកស្ថាប័នកម្ពុជា និងសហរដ្ឋអាមេរិកមកគាំទ្រអាកាសយានដ្ឋានអន្តរជាតិតេជោ ការផ្តល់ហិរញ្ញប្បទាននេះជំរុញហេដ្ឋារចនាសម្ព័ន្ធដែលសម្រួលដល់ពាណិជ្ជកម្ម ទេសចរណ៍ និងការវិនិយោគ ខណៈពេលដែលរួមចំណែកដល់ការអភិវឌ្ឍសេដ្ឋកិច្ចរយៈពេលវែងរបស់ប្រទេសកម្ពុជា៕