លោកត្រាំ បង្ហើបពីលទ្ធភាព«គ្រប់គ្រងដោយសន្តិវិធី» លើប្រទេសគុយបា

លោក​ប្រធានាធិបតី ដូណាល់ ត្រាំ បានថ្លែង​ថា សហរដ្ឋអាមេរិកអាចនឹងឈានទៅរកការ «គ្រប់គ្រងដោយសន្តិវិធី» លើប្រទេសគុយបា ដោយលោកបានពណ៌នាថាប្រទេសនេះជា «ប្រជាជាតិដែលកំពុងបរាជ័យ» និងកំពុងជួបវិបត្តិហិរញ្ញវត្ថុយ៉ាងធ្ងន់ធ្ងរ។

យោង​តាម​ Al Jazeera ក្នុងការថ្លែងទៅកាន់អ្នកសារព័ត៌មាននៅសេតវិមាន​កាលពីថ្ងៃសុក្រ​ទី​២៧​ខែ​កុម្ភៈ​ឆ្នាំ​២០២៦ លោកត្រាំ​បានអះអាងថា រដ្ឋាភិបាលគុយបាកំពុងពិភាក្សាជាមួយរដ្ឋបាលរបស់លោក ដោយកត់សម្គាល់ថា ប្រទេសនេះគ្មានប្រាក់ គ្មានប្រេង និងគ្មានអាហារ។ លោកត្រាំ បានបញ្ជាក់ថា «ប្រហែលជាយើងនឹងមានការគ្រប់គ្រងដោយសន្តិវិធីលើគុយបា» ដោយបន្ថែមថា រដ្ឋមន្ត្រីការបរទេសលោក Marco Rubio កំពុងដឹកនាំកិច្ចការកម្រិតខ្ពស់​មួយ​នេះ។

ការលើកឡើងនេះ បានធ្វើឡើងបន្ទាប់ពីសហរដ្ឋអាមេរិកបានដាក់សម្ពាធយ៉ាងខ្លាំងក្នុងរយៈពេលប៉ុន្មានខែចុងក្រោយ រួមមានការបិទខ្ទប់ការផ្គត់ផ្គង់ប្រេង និងប្រតិបត្តិការយោធាកាលពីខែមករា ដើម្បីចាប់ខ្លួនសម្ព័ន្ធមិត្ត​គុយបា​គឺ​លោក​ប្រធានាធិបតីវ៉េណេស៊ុយអេឡា Nicolas Maduro ដែលបានបណ្តាល​ឲ្យ​ទាហានគុយបា៣២​នាក់បាត់បង់ជីវិត។ ទោះបីជាអង្គការសហប្រជាជាតិបានព្រមានអំពីការដួលរលំផ្នែកមនុស្សធម៌ដោយសារទណ្ឌកម្មទាំងនេះក្តី ក៏លោកបានអះអាង​ថា លោកបានឮអំពីបំណងចង់ផ្លាស់ប្តូរនៅគុយបាតាំងពីលោកនៅក្មេងមក​ម៉្លេះ ហើយលោកជឿថាការផ្លាស់ប្តូរនឹងផ្តល់ផលវិជ្ជមាន។

ជាការឆ្លើយតប ប្រធានាធិបតីគុយបា លោក Miguel Diaz-Canel បានថ្កោលទោសយុទ្ធនាការរបស់អាមេរិកថាជា «ទង្វើ​ផ្ដាច់ការ» និង «អំពើប្រល័យពូជសាសន៍» ដោយចោទប្រកាន់រដ្ឋបាលលោកត្រាំ ថាព្យាយាមច្របាច់កសេដ្ឋកិច្ចគុយបា៕

ប្រែសម្រួល៖ ឈាង