តំណាងកម្ពុជា និងចិន សន្យាធ្វើការជិតស្និទ្ធជាមួយគ្នាក្នុងក្របខណ្ឌអង្គការសហប្រជាជាតិ នៅឯទីក្រុងហ្សឺណែវ

កម្ពុជា និងចិន បានបញ្ជាក់ពីការចាប់ដៃធ្វើការជាមួយគ្នាឱ្យបានកាន់តែជិតស្និទ្ធ​ ដើម្បីការគាំទ្រគ្នាទៅវិញទៅមក ក្នុងក្របខណ្ឌអង្គការសហប្រជាជាតិ ខណៈប្រទេសទាំងពីរកំពុងបន្តរឹតចំណងមិត្តភាពដ៏រឹងមាំ។  

ការបញ្ជាក់នេះបានធ្វើឡើងដោយលោក កែ សុវណ្ណ តំណាងអចិន្ត្រៃយ៍របស់កម្ពុជាប្រចាំនៅអង្គការសហប្រជាជាតិ ក្នុងទីក្រុងហ្សឺណែវ ជាមួយនឹងលោក JIA Guide តំណាងអចិន្រ្តៃយ៍ចិន។ ជំនួបសន្ទនារវាងមន្ត្រីការទូតទាំងពីរដែលបានធ្វើឡើងកាលពីរសៀលថ្ងៃទី២១ ខែមេសា ឆ្នាំ២០២៦ បានគូសបញ្ជាក់អំពីចំណងមិត្តភាព និងទំនាក់ទំនងដ៏រឹងមាំ និងយូរអង្វែងរវាងកម្ពុជា និងចិន ដូចដែលបានឆ្លុះបញ្ចាំង តាមរយៈការផ្លាស់ប្តូរទស្សនកិច្ចជាន់ខ្ពស់ទៀងទាត់ និងកិច្ចសហប្រតិបត្តិការយ៉ាងជិតស្និទ្ធលើគ្រប់វិស័យសំខាន់ៗ រួមមាន ពាណិជ្ជកម្ម វិនិយោគ និងទេសចរណ៍។

ភាគីទាំងពីរ បានសន្យាថា នឹងបន្តកិច្ចសហប្រតិបត្តិការយ៉ាងជិតស្និទ្ធរវាងស្ថានបេសកកម្មអចិន្រ្តៃយ៍ទាំងពីរ និងការផ្លាស់ប្តូរការគាំទ្រគ្នាលើបណ្តាវិស័យដែលផ្តល់ផលប្រយោជន៍រួម ក្នុងក្របខណ្ឌអង្គការសហប្រជាជាតិ។

លោក កែ សុវណ្ណ និងលោក JIA Guide ក៏បានផ្លាស់ប្តូរយោបល់គ្នាលើលទ្ធផលសំខាន់ៗក្រោមគំនិតផ្តួចផ្តើមរបស់លោកប្រធានាធិបតីចិន ស៊ី ជីនពីង រួមមានគំនិតផ្តួចផ្តើមខ្សែក្រវ៉ាត់ និងផ្លូវអភិវឌ្ឍន៍ និងអភិបាលកិច្ចសកល ដែលផ្តល់ប្រយោជន៍ដល់បណ្តាប្រទេសកំពុងអភិវឌ្ឍន៍៕