លោក កេត ម៉ៅ ត្រូវបានផ្ទេរភារកិច្ចចេញពីអភិបាលស្រុកត្រាំកក់ ជំនួសដោយលោក ហ៊ត មនោ

យោងតាមលិខិតមួយច្បាប់របស់រដ្ឋបាលខេត្តតាកែវ ស្ដីពីការផ្ទេរភារកិច្ច និងតែងតាំងមុខតំណែងថ្មីអភិបាលនៃគណៈអភិបាលស្រុកត្រាំកក់ លោក កេត ម៉ៅ ត្រូវបានផ្ទេរតំណែងចេញពីអភិបាលនៃអណៈអភិបាលស្រុកត្រាំកក់ និងជំនួសដោយលោក ហ៊ត មនោ។

តាមរយៈលិខិតប្រកាសចូលកាន់តំណែងជាអភិបាលស្រុកត្រាំកក់ របស់រដ្ឋបាលខេត្តតាកែវ ពីធីនេះនឹងត្រូវធ្វើឡើងនៅព្រឹកថ្ងៃពុធ ទី៣ ខែមិថុនា ឆ្នាំ២០២៦ ក្រោមអធិបតីភាព លោក វ៉ី សំណាង អភិបាលនៃគណៈអភិបាលខេត្តតាកែវ នៅសាលប្រជុំរបស់រដ្ឋបាលស្រុកត្រាំកក់តែម្ដង។ ទោះបីយ៉ាងណា នៅមិនទាន់មានរបាយគារណ៍ណាមួយបញ្ជាក់ថា លោក កេត ម៉ៅ ត្រូវផ្ទេរភារកិច្ច ឬទៅកាន់មុខតំណែងថ្មីជាអ្វីនោះទេ។

សូមជម្រាបថា លោក ហ៊ត មនោ បច្ចុប្បន្នជាអភិបាលរងនៃអណៈអភិបាលក្រុងដូនកែវ និងត្រូវជាកូនរបស់លោក ហ៊ត ឆែម អតីតអភិបាលស្រុកដូនកែវ ហើយក៏ជាអតីតអភិបាលស្រុកត្រាំកក់ ខេត្តតាកែវផងដែរ។

គួររំលឹកថា លោក កេត ម៉ៅ នាពេលថ្មីៗកន្លងមកនេះ មានសារបែកធ្លាយនៅលើបណ្ដាញសង្គមពីការលួងលោម​សុំស្នេហ៍​ពី​និស្សិត​ឆ្នាំទី​៣ម្នាក់ ដែលធ្វើឲ្យមហាជនអ្នកលេងបណ្ដាញសង្គមបញ្ចេញមតិរិះគន់យ៉ាងចាស់ដៃផងដែរ។ នៅថ្ងៃទី២៧ ខែឧសភា ឆ្នាំ២០២៦ អគ្គាធិការដ្ឋានក្រសួងមហាផ្ទៃ ក៏បានកោះហៅស្ត្រីឈ្មោះ គួន សុភា រស់នៅភូមិសេកយា ឃុំអង្គតាសោម ស្រុកត្រាំកក់ ដែលជាសាមីខ្លួនក្នុងអង្គហេតុនេះឲ្យចូលខ្លួនបំភ្លឺជុំវិញបញ្ហាខាងលើនេះ។

ជុំវិញការប្រកាសផ្ទេរ និងតែងតាំងមុខតំណែងអភិបាលស្រុកត្រាំកក់ថ្មីនៅថ្ងៃស្អែកនេះ លោក វ៉ី សំណាង អភិបាលនៃគណៈអភិបាលខេត្តតាកែវ នៅមិនអាចបញ្ជាក់បាននៅឡើយទេ គិតត្រឹមព្រឹកថ្ងៃទី២ ខែមិថុនា ឆ្នាំ២០២៦នេះ៕

អត្ថបទ៖ សុខុម