សម្តេចតេជោ គ្រោងអញ្ជើញរដ្ឋមន្រ្តីការបរទេសភូមាមកកម្ពុជា ដើម្បីនិយាយគ្នារឿងចូលរួមប្រជុំអាស៊ាន

ប្រមុខដឹកនាំកម្ពុជា សម្តេចតេជោ ហ៊ុន សែន បានបង្ហើបឱ្យដឹងថា សម្តេចគ្រោងអញ្ជើញរដ្ឋមន្រ្តីការបរទេសភូមា មកធ្វើទស្សនកិច្ចនៅក្នុងប្រទេសកម្ពុជានៅថ្ងៃទី០៦ និងទី០៧ ខែធ្នូ ឆ្នាំ២០២១ ពោល គឺនៅសប្តាហ៍ក្រោយនេះ។ សម្តេចតេជោនាយករដ្ឋមន្រ្តី បានអះអាងថា សម្តេច នឹងពិភាក្សាជាមួយរដ្ឋមន្រ្តីការបរទេសភូមា ដើម្បីស្វែងរកដំណោះស្រាយឱ្យចូលរួមកិច្ចប្រជុំអាស៊ានឡើងវិញ។

នៅក្នុងពិធីសម្ពោធដាក់ឲ្យប្រើប្រាស់ជាផ្លូវការផ្លូវចំនួន ៣៧ខ្សែ និងអាងប្រព្រឹត្តកម្មទឹកកខ្វក់ចំនួន៣ និងសមិទ្ធផលនានាក្នុងក្រុងព្រះសីហនុនៅព្រឹកនេះ សម្តេចតេជោ ហ៊ុន សែន ក៏បានបង្ហើបឱ្យដឹងផងដែរថា សម្តេច ក៏បានត្រៀមខ្លួនទៅធ្វើទស្សនកិច្ចនៅក្នុងប្រទេសភូមានាពេលខាងមុខនេះផងដែរ។ សម្តេច អាចទៅទស្សនកិច្ចនៅភូមា ក្នុងនាមជានាយករដ្ឋមន្រ្តីកម្ពុជា បើសិនមិនអាចទៅក្នុងនាមជាប្រធានអាស៊ានបាន។

សូមបញ្ជាក់ថា នៅក្នុងកិច្ចប្រជុំកំពួលអាស៊ាននៅក្នុងប្រទេសព្រុយណេ ថ្នាក់ដឹកនាំអាស៊ានបានឯកភាពមិនអញ្ជើញមេដឹកនាំភូមាឱ្យចូលរួមកិច្ចប្រជុំនោះទេ តែបានអនុញ្ញាតឱ្យតំណាងមិនមែន​មន្រ្តីរដ្ឋាភិបាលមកចូលរួមបាន។ ប៉ុន្តែ រដ្ឋាភិបាលយោធាភូមា មិនបញ្ជូនមកចូលរួមឡើយ។ ចំពោះបញ្ហានេះ សម្តេចតេជោចោទសួរថា តើគួរទុកស្ថានភាពអាស៊ានត្រឹមមានសមាជិកតែ៩ ឬក៏សមាជិក១០ និងថា តើអាស៊ានសុខចិត្តដុតបំផ្លា​ញផ្ទះខ្លួនឯង ដើម្បីដៃគូ ឬយ៉ាងណា។ បើតាមសម្តេចនាយករដ្ឋមន្រ្តីកម្ពុជា បើអាស៊ាននៅតែមានសមាជិកតែ៩ គឺមិនមែនកុងសង់ស៊ីសទេ ហើយធម្មនុញ្ញអាស៊ានក៏មិនបានចែងឱ្យបណ្តេញសមាជិកណាម្នាក់ចេញពីអាស៊ាននោះដែរ៕

អត្ថបទ៖​ វណ្ណ សុគន្ធា