មកដល់បច្ចុប្បន្ននេះ កម្ពុជា មានយានយន្តដែលបានចុះបញ្ជីចំនួនជាង ៦លានគ្រឿង

ពីឆ្នាំ១៩៩០ រហូតមកដល់បច្ចុប្បន្ននេះ យានយន្តដែលបានចុះបញ្ជីនៅទូទាំងប្រទេស មានចំនួនជាង ៦ លានគ្រឿង ។ ក្នុងនោះ រថយន្ត មានចំនួនជាង ៩៤ ម៉ឺនគ្រឿង (៩៤៤,៦៥៧ គ្រឿង) ទោចក្រយានយន្តមានចំនួនជាង៥លានគ្រឿង(៥,៣៦០,៤៧៨ គ្រឿង)។ នេះបើតាមការឱ្យដឹងរបស់លោក ឈួន វ៉ន់ អគ្គនាយកនៃអគ្គនាយកដ្ឋាន ដឹកជញ្ជូនផ្លូវគោកក្រសួងសាធារណការ និងដឹកជញ្ជូន កាលពីល្ងាចថ្ងៃទី២២ ខែធ្នូឆ្នាំ២០២១។

លោក ឈួន វ៉ន់ បានឱ្យដឹងទៀតថា ក្រសួងសាធារណការ និងដឹកជញ្ជូន បានរៀបចំប្រព័ន្ធស្វ័យប្រវត្តិកម្មដឹកជញ្ជូនផ្លូវគោកអានឡាញ (Online)ពីឆ្នាំ២០១៦ដល់បច្ចុប្បន្ន ដោយអនុញ្ញាតឱ្យហាងចុះបញ្ជី ដើម្បីឱ្យស្របនឹងច្បាប់ចរាចរណ៍ផ្លូវគោក ក្នុងនោះ ហាងលក់យានយន្តសរុបមានចំនួន ១៥៧ហាង បានភ្ជាប់ប្រព័ន្ធជាមួយប្រព័ន្ធរបស់អគ្គនាយកដ្ឋានគយ និងពន្ធដារ។ ការរៀបចំការចុះបញ្ជីតាមប្រព័ន្ធអនឡាញ គឺដើម្បីផ្តល់សេវាប្រកបដោយប្រសិទ្ធភាព តម្លាភាព ឲ្យបានលឿន ឲ្យបានជិតប្រជាពលរដ្ឋ និងបញ្ជៀសការស្វែងរកសេវាក្រៅផ្លូវការ៕

អត្ថបទ ៖ ណារី