កម្ពុជា​ស្វាគមន៍​ជើង​ហោះហើរ​ពីបាង​កក​មក​ភ្នំពេញ​ ក្រោយការផ្អាកជាង ២ ឆ្នាំ ដោយសារជំងឺកូវីដ១៩

ប្រទេសកម្ពុជាបានស្វាគមន៍ជើងហោះហើររវាងរាជធានីបាងកក និងរាជធានីភ្នំពេញជាប្រក្រតី ចំនួន៣ជើងក្នុងមួយសប្ដាហ៍ជាលើកដំបូងក្រោយពីមានការខកខានដោយសារការរាតត្បាតជំងឺកូវីដ១៩។

ថ្លែងក្នុងឱកាសស្វាគមន៍ជើងហោះហើរ របស់ក្រុមហ៊ុនអាកាសចរ Thai Vietjet Air នៅថ្ងៃទី ១៦ ខែមីនា ឆ្នាំ២០២២ នៅអាកាសយាន្តដ្ឋានភ្នំពេញអន្តរជាតិ លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិលបានមានប្រសាសន៍ថា «តាងនាមរដ្ឋលេខាធិការដ្ឋានអាកាសចរស៊ីវិល និងរាជរដ្ឋាភិបាលកម្ពុជាខ្ញុំសូមអបអរសារទរ និងស្វាគមន៍យ៉ាងកក់ក្ដៅបំផុត ចំពោះថ្នាក់ដឹកនាំ និងបុគ្គលិកក្រុមហ៊ុនអាកាសចរ Thai Vietjet Air ដែលបានរួមគ្នា ខិតខំដាក់ដំណើរការហោះហើរ ពីរាជធានីបាងកកមកកាន់រាជធានីភ្នំពេញ ក្នុងដំណាក់កាលពិភពលោក រួមទាំងប្រទេសកម្ពុជានិងថៃឡង់ដ៍ ជួបប្រទះវិបត្តិធ្ងន់ធ្ងរនៃរោគរាតត្បាតជំងឺកូវីដ-១៩ និងការកើនឡើងថ្លៃប្រេងយ៉ាងគំហុកដោយសារសង្គ្រាមនៅប្រទេសអ៊ុយក្រែន»។

លោករដ្ឋមន្ត្រីបានចាត់ទុកវត្តមានរបស់ ក្រុមហ៊ុនអាកាសចរ ThaiVietjet Air នៅពេលនេះ នឹងចូលរួមចំណែកយ៉ាងសំខាន់ ផ្តល់នូវជម្រើសសំបូរបែបដល់អ្នកធ្វើដំណើរតាមផ្លូវអាកាសរវាងកម្ពុជានិង ថៃឡង់ដ៍ ដែលជាសរុបមានចំនួន៦ក្រុមហ៊ុនអាកាសចរ កំពុងហោះហើរ ហើយជាបន្ថែមលើសពីនេះទៅទៀត ដំណើរការហោះហើរនេះ នឹងចូលរួម ចំណែកដោយផ្ទាល់ផងដែរ ដល់ការបង្កើនទំនាក់ទងឲ្យកាន់តែជិតស្និទ្ធ ថែមទៀត លើសកម្មភាពដោះដូរពាណិជកម្ម វប្បធម៌និងប្រជាជន រវាងប្រទេសយើងទាំងពីរ។

លោករដ្ឋមន្ត្រីបានមានប្រសាសន៍ថា ក្រុមហ៊ុនអាកាសចរ Thai Vietjet Air  គឺក្រុមហ៊ុនអាកាសចរបរទេសទី១ ក្នុងរយៈពេល ២ឆ្នាំកន្លងមក ដែលប្រទេសកម្ពុជា បានខកខានស្វាគមន៍ក្រុម ហ៊ុនអាកាសចរថ្មីៗ ឬ ជើងហោះហើរបរទេសថ្មីៗ ចាប់តាំងពីមានការរីក រាលដាលជំងឺកូវីដ-១៩ នៅដើមឆ្នាំ២០២០។

រយៈពេល ២ ឆ្នាំកន្លងមកនេះ រដ្ឋលេខាធិការដ្ឋានអាកាសចរស៊ីវិល បានទទួលសំណើពីបណ្តាក្រុមហ៊ុន អាកាសចរនានា ត្រឹមតែផ្អាកជើងហោះហើរជាបណ្តោះអាសន្ន ឬ លែង ហោះហើរទាំងស្រុង ដោយគ្មានកាលកំណត់ ឬ ដោយក្ស័យធន។

លោក W0ranate Laprabang អគ្គនាយកក្រុមហ៊ុនអាកាសចរ Thai Vietjet Air បានមានប្រសាសន៍ថា ក្រុមហ៊ុនមានសេចក្តីរីករាយយ៉ាងខ្លាំងដែលបានពង្រីកការហោះហើរលក្ខណៈអន្តរជាតិរបស់យើងម្តងទៀតបន្ទាប់ពីអាក់ខានដោយសារជំងឺកូវីដ១៩។

លោកបានបន្តថា ក្នុងការចាប់ផ្តើមការហោះហើរជាលើកដំបូងនេះក្រុមហ៊ុននឹងផ្តល់ការហោះហើរពីភ្នំពេញបាកកចំនួន៣ជើងក្នុង១សប្តាហ៍នៅរៀងរាល់ថ្ងៃច័ន្ធ ថ្ងៃពុធនិងថ្ងៃព្រហស្បតាមរយៈយន្តហោះលេខVZ720ដែលហោះហើរពីបាងកកទៅភ្នំពេញចាប់ពីម៉ោង៨និង៣០នាទីទៅដល់ម៉ោង៩និង៤០នាទីនិងជើងហោះហើរលេខ VZ721ពីភ្នំពេញទៅបាងកកចាប់ពីម៉ោង១០និង៣០នាទីទៅដល់ម៉ោង១១និង៤៥នាទី។

លោកអគ្គនាយកមានជំនឿជឿជាក់ថា ការបើកជើងហោះហើជាលើកដំបូងនេះនឹងដើរតួនាទីយ៉ាងសំខាន់ណាស់ក្នុងការតភ្ចាប់ស្ពានចម្លងប្រជាជនប្រទេសទាំពីរព្រមទាំងចូលរួមចំណែកការងើបឡើងវិញនៃភ្ញៀវទេសចរនិងចូលរួមអភិវឌ្ឍន៍សេដ្ឋកិច្ចប្រទេសកម្ពុជាផងដែរ៕

អត្ថបទ៖ សំអឿន