សភាពាណិជ្ជកម្មខេត្តស្វាយរៀង ទទួលជួប​ទូតឥណ្ឌូនេស៊ី​ស្វែងយល់ពីកិច្ចសហការ​ពាណិជ្ជកម្ម

(ស្វាយរៀង)៖ លោកឧកញ៉ា សុក រ៉ាដូ ប្រធានសភាពាណិជ្ជកម្មខេត្តស្វាយរៀង បានទទួលជួបលោកSudirman Haseng ឯកអគ្គរដ្ឋទូតនៃសាធារណរដ្ឋឥណ្ឌូនេស៊ី ប្រចាំព្រះរាជាណាចក្រកម្ពុជា ដើម្បីស្វែងយល់ពីកិច្ចសហប្រតិ​បត្តិការពាណិជ្ជកម្ម និងវិនិយោគបន្ថែមទៀតរវាងឥណ្ឌូនេស៊ី និងកម្ពុជា ជាពិសេសវិនិយោគនៅខេត្តស្វាយរៀង នៅថ្ងៃទី ១៦ ខែ មិថុនា។

នៅក្នុងជំនួបនេះ លោកឧកញ៉ា សុក រ៉ាដូ បានជំរុញដល់ទូតឥណ្ឌូនេស៊ីជួយកៀរគរអ្នកវិនិយោគិនឥណ្ឌូនេស៊ី មកវិនិយោគនៅកម្ពុជាឱ្យបានច្រើន ដោយផ្តោតគោលសំដៅសំខាន់ នៅខេត្តស្វាយរៀង។

លោកឧកញ៉ា បានរូមដំណើរជាមួយទូតឥណ្ឌូនេស៊ី បំពេញទស្សនកិច្ចនៅរោងចក្រកង់ ក្នុងតំបន់សេដ្ឋកិច្ចពិសេសមេន​ហាធេន និងរោងចក្រផលិតគ្រឿងអគ្គិសនី ក្នុងតំបន់សេដ្ឋកិច្ចពិសេសតាយសេង  និងចុះសិក្សាស្វែងយល់អំពី​ពាណិជ្ជកម្ម​ព្រំដែនកម្ពុជា-វៀតណាម ផងដែរ។

បើតាមលោកឧកញ៉ា សុក រ៉ាដូ ក្នុងជំនួបពិភាក្សាជាមួយក្រុមហ៊ុនរោងចក្រ និងស្ថានទូតឥណ្ឌូណេស៊ីក៏បានលើក​ឡើងចំណុច​សំខាន់ៗ ពាក់ព័ន្ធទៅនិងវត្ថុធាតុដើម ការដំឡើងកង់ និងផលិតគ្រឿងអគ្គិសនីព្រមទាំងទីផ្សារ​នាំចេញជាដើម។  ជាមួយគ្នានេះ ទូតឥណ្ឌូណេស៊ីក៏បានចុះសួរសុខទុក្ខជាមួយជនជាតិឥណ្ឌូនេស៊ីដែល​កំពុង​បម្រើការងារនៅតាមក្រុមហ៊ុនរោងចក្រ កាស៊ីណូមួយចំនួន នៅក្រុងបាវិតផងដែរ។

លោក Sudirman Haseng ឯកអគ្គរដ្ឋទូតនៃសាធារណរដ្ឋឥណ្ឌូនេស៊ី ប្រចាំព្រះរាជាណាចក្រកម្ពុជា បានថ្លែងនូវការ​កោតសរសើរដល់សភាពាណិជ្ជកម្មខេត្តស្វាយរៀង អាជ្ញាធរដែនដីដែលបានផ្ដល់​ឱកាសឲ្យមន្រ្តីស្ថានទូតឥណ្ឌូនេស៊ី ចុះសិក្សា​ស្វែង​យល់អំពីវិស័យវិនិយោគនៅខេត្តស្វាយរៀង ហើយក្នុងនាមលោកជាឯកអគ្គរាជទូត និងនាំអ្នកវិនិយោគ​ឥណ្ឌូនេស៊ីមកបណ្ដាក់ទុនរកស៊ីនៅខេត្តស្វាយរៀងបន្ថែមទៀ តដែលឆ្លុះបញ្ចាំងឲ្យឃើញពីការទំនាក់ទំនង​ដ៏ល្អរវាង​ប្រទេសឥណ្ឌូនេស៊ី និងកម្ពុជា។

សូមបញ្ជាក់ថា ឯកអគ្គរដ្ឋទូតនៃសាធារណរដ្ឋឥណ្ឌូនេស៊ី បំពេញទស្សនកិច្ចនៅខេត្តស្វាយរៀងចំនួនបីថ្ងៃ ចាប់ពីថ្ងៃទី ១៥-១៧ ខែមិថុនា ឆ្នាំ ២០២២៕ ភក្តី