ប្រធានក្រុមការងារចុះមូលដ្ឋានក្រុងបាវិតថា វឌ្ឍនភាពរបស់ក្រុង ធ្វើឱ្យពលរដ្ឋខេត្តស្វាយរៀង មានការងារធ្វើគ្រប់ៗគ្នា

លោក សាម អ៊ីន រដ្ឋលេខាធិការក្រសួងបរិស្ថាន និងជាប្រធានក្រុមការងាររាជរដ្ឋាភិបាលចុះមូលដ្ឋានក្រុងបាវិត ខេត្តស្វាយរៀង បានថ្លែងថា វឌ្ឍនភាពរបស់ក្រុងបាវិត ជាកត្តាធ្វើឱ្យពលរដ្ឋខេត្តស្វាយរៀង មានការងារធ្វើគ្រប់ៗគ្នា។ លោកបានលើកឡើងបែបនេះ ក្នុងកិច្ចប្រជុំក្រុមការងាររាជរដ្ឋាភិបាល ចុះមូលដ្ឋានក្រុងបាវិត នៅព្រឹកថ្ងៃទី២១ ខែមីនា ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបញ្ជាក់ថា «វឌ្ឍនភាពរបស់ក្រុងបាវិតនាថ្ងៃនេះ ពិតជាមានការរីកចម្រើនគួរឱ្យកត់សម្គាល់ ទាំងតំបន់រោងចក្រសហគ្រាស តំបន់សេដ្ឋកិច្ចពិសេសទាំង១២ ដែលកំពុងតែដំណើរការយ៉ាងសស្រាក់សស្រាំ ដែលជាកត្តាធ្វើឱ្យប្រជាពលរដ្ឋក្នុងខេត្តស្វាយរៀង មានការងារធ្វើគ្រប់ៗគ្នា និងមានជីវភាពសមរម្យក្នុងពេលបច្ចុប្បន្ន»។

លោកបានបន្ថែមថា ក្រោមការដឹកនាំដ៏ឈ្លៀសវៃរបស់ប្រមុខរាជរដ្ឋរដ្ឋាភិបាលកម្ពុជា ដែលមាន សម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រីនៃព្រះរាជាណាចក្រកម្ពុជា បានដាក់ចេញនូវយុទ្ធសាស្ត្របញ្ចកោណដំណាក់កាលទី១ រួមមាន កំណើនសេដ្ឋកិច្ច, ការងារ, សមធម៌, ប្រសិទ្ធិភាព, និងចីរភាព។

ចំណែក លោក ម៉ែន អេង អភិបាលរងខេត្ត បានរំលេចពីសេចក្តីត្រូវការកម្លាំងពលកម្មនៅក្នុងខេត្តស្វាយរៀង លោកបានគូសបញ្ជាក់ផងដែរថា ក្នុងខេត្តស្វាយរៀងមានតំបន់សេដ្ឋកិច្ចពិសេសចំនួន ១២កន្លែង រោងចក្រសហគ្រាសចំនួន ១ ០០៣ កន្លែង ដែលមាន កម្មករ-កម្មការិនី កំពុងបម្រើការងារក្នុងរោងចក្រសហគ្រាសចំនួន ១៥ម៉ឺននាក់៕

ដោយ៖ភក្ដី