រុស្ស៊ី ផ្លាស់ប្តូរយុទ្ធសាស្រ្ត និងពង្រីកគោលដៅយោធា នៅអ៊ុយក្រែន (មានវីដេអូ)

រដ្ឋមន្ត្រីការបរទេសរុស្ស៊ី លោក Sergei Lavrov បាននិយាយថា គោលដៅរបស់យោធារុស្ស៊ីនៅក្នុងប្រទេសអ៊ុយក្រែន មិនមែនផ្តោតសំខាន់តែនៅភាគខាងកើតប្រទេសនោះទៀតទេ។

នៅក្នុងបទសម្ភាសន៍ជាមួយប្រព័ន្ធផ្សព្វផ្សាយរដ្ឋរុស្ស៊ី លោកបានបង្កប់ន័យថា យុទ្ធសាស្ត្ររបស់ទីក្រុងមូស្គូ បានផ្លាស់ប្តូរហើយ បន្ទាប់ពីបស្ចិមប្រទេស ផ្គត់ផ្គង់អាវុធរយៈចម្ងាយឆ្ងាយដល់អ៊ុយក្រែន។

លោកបានពន្យល់ថា ឥឡូវនេះ រុស្ស៊ីនឹងត្រូវកម្ចាត់កងកម្លាំងអ៊ុយក្រែនបន្ថែមទៀត ចេញពីខ្សែត្រៀមជួរមុខ ដើម្បីធានាសន្តិសុខផ្ទាល់ខ្លួន។

ប្រាំខែបន្ទាប់ពីការលុកលុយអ៊ុយក្រែន រុស្ស៊ីបានកាន់កាប់ផ្នែកខ្លះនៃភាគខាងកើត និងភាគខាងត្បូងប្រទេស ប៉ុន្តែមិនអាចសម្រេចដូចគោលបំណងដើមរបស់ខ្លួន ក្នុងការដណ្តើមយកទីក្រុង កៀវ បានទេ ហើយចាប់តាំងពីពេលនោះមកបានអះអាងថា គោលបំណងសំខាន់របស់ខ្លួនគឺរំដោះតំបន់ Donbas។

ចាប់តាំងពីខែកុម្ភៈមក លោកខាងលិចបានផ្គត់ផ្គង់ដល់អ៊ុយក្រែន នូវសព្វាវុធដ៏មានអានុភាពកាន់តែខ្លាំង ដើម្បីប្រើប្រាស់ក្នុងការការពារប្រឆាំងនឹងកងកម្លាំងរុស្ស៊ី។

លោក Lavrov និយាយ​ថា “រឿងនោះហើយ​បាន​បង្ខំ​ឲ្យរុស្ស៊ី​ ​ពង្រីក​គោលបំណង​របស់​ខ្លួន​បន្ថែម​ទៀត។ យើងមិនអាចអនុញ្ញាតឲ្យផ្នែកនៃប្រទេសអ៊ុយក្រែនដែលគ្រប់គ្រងដោយលោកប្រធានាធិបតី Volodymyr] Zelensky កាន់កាប់អាវុធ ដែលនឹងបង្កការគំរាមកំហែងដោយផ្ទាល់ ដល់ទឹកដីរបស់យើងនោះទេ”។

លោកបន្តថា “ឥឡូវនេះ ភូមិសាស្ត្រគឺខុសគ្នា។ តំបន់ Kherson និង Zaporizhzhia ភាគខាងត្បូងគឺជាគោលបំណងចុងក្រោយរបស់រុស្ស៊ី។ កងកម្លាំងរបស់ទីក្រុងមូស្គូ បានកាន់កាប់ផ្នែកខ្លះនៃតំបន់ទាំងពីរនេះរួចទៅហើយ”៕

សូមទស្សនាវីដេអូ៖

ប្រែសម្រួល៖​ Vann Vann

ប្រភព៖ BBC

ចុចអាន៖ ទាហានរុស្ស៊ី ស្លាប់ និងរបួស ក្នុងឧប្បត្តិហេតុដ៏អាថ៌កំបាំង នៅរោងចក្រថាមពលនុយក្លេអ៊ែរ