ទឹម រដ្ឋា ៖ លុយរកបានតិចឬច្រើនអាស្រ័យលើខ្លួនឯង តែភាពដ៏ស្មោះត្រង់យូរអង្វែងមិនងាយមានច្រើនទេ

តារាសម្តែង និងម៉ូឌែលអ្នកនាង ទឹម រដ្ឋា ស្របពេលដែលអាជីពសិល្ប:កំពុងតែមានសន្ទុះទីផ្សាច្រើនគួរសមនោះ គឺស្រាប់​តារាស្រីរូបនេះបញ្ចេញប្រយោគដ៏គួរចាប់អារម្មណ៍ក្រោយជួបមិត្តភក្តិចាស់អ្នកនាង យ៉ាន់ លីនដា។

ទំនាក់ទំនងរវាងតារាស្រីពីរដួងគឺ ទឹម រដ្ឋា និង យ៉ាន់ លីនដា គិតមកដល់ពេលនេះមានរយ:ពេលយូរឆ្នាំមកហើយ ​ខណ:​កន្លងមកអ្នកនាង យ៉ាន់ លីនដា ធ្លាប់ឡើងយន្តហោះពីក្រៅប្រទេសមកចូលរួមពិធីមង្គលការរបស់តារាស្រីអ្នកនាង ទឹម រដ្ឋា ផងដែរ។ ជាក់ស្តែងអំឡុងពេល យ៉ាន់ លីនដា មកលេងស្រុកខ្មែរក៏បានស្កាត់ជួបជាមួយមិត្តសម្លាញ់ ទឹម រដ្ឋា។

បង្ហោះភ្ជាប់រូបភាពស្និទ្ធស្នាលជាមួយអ្នកនាង យ៉ាន់ លីនដា តារាស្រី ទឹម រដ្ឋា បានលើកឡើងថា «លុយពិតជាអាចរកបានតិច ឬច្រើនអាស្រ័យទៅលើយើងខ្លួនឯង តែទំនាក់ទំនងដ៏ស្មោះត្រង់និងយូរអង្វែងបែបនេះ គឺមិនងាយមានច្រើនទេ»។ ខ្លឹមសារ និងរូបនេះបានធ្វើឲ្យអ្នកគាំទ្រសរសើរគ្រប់គ្នាចំពោះមិត្តភាពដ៏ល្អរបស់អ្នកទាំងពីរ។

ជាការពិតទំនាក់ទំនងរបស់តារាស្រី ទឹម រដ្ឋា និងអ្នកនាង យ៉ាន់ លីនដា ត្រូវបានគេដឹងថា អ្នកទាំងពីរគឺជាមិត្តសម្លាញ់រាប់អានគ្នាស្និទ្ធស្នាលយូរឆ្នាំមកហើយថ្វីត្បិតថាអ្នកនាង យ៉ាន់ លីនដា បានទៅរស់នៅក្រៅប្រទេសពិតមែនប៉ុន្តែអ្នកទាំងពីរនៅតែមានទំនាក់ទំនងល្អជាមួយគ្នាជានិច្ច។ ទង្វើរនេះបានធ្វើឲ្យអ្នកគាំទ្រសរសើរគ្រប់គ្នា៕

អត្ថបទ៖ ចាន់រ៉ា