សម្ដេចតេជោ ហ៊ុន សែន ៖ សារព័ត៌មានអន្តរជាតិធំៗ បានផ្សាយល្អអំពីស៊ីហ្គេមដែលកម្ពុជាធ្វើម្ចាស់ផ្ទះ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានឲ្យដឹងថា ស្ថាប័នសារព័ត៌មានធំៗនៅលើពិភពលោក បានផ្សព្វផ្សាយល្អអំពីកម្ពុជា សម្រាប់ការរៀបចំព្រឹត្តិការណ៍ស៊ីហ្គេមលើកទី ៣២ ដែលទើបនឹងបញ្ចប់កាលពីពេលថ្មីៗនេះ។

ការឲ្យដឹងរបស់សម្ដេចតេជោ ហ៊ុន សែន បានធ្វើឡើងក្នុងពិធីសំណេះសំណាលជាមួយកីឡាករ-កីឡាការិនីអាស៊ានប៉ារ៉ាហ្គេមលើកទី ១២ នៅល្ងាចថ្ងៃទី ២៦ ខែឧសភា ឆ្នាំ ២០២៣នេះ។ ប្រទេសកម្ពុជា បានធ្វើជាម្ចាស់ផ្ទះរៀបចំស៊ីហ្គេមលើកទី ៣២ ចាប់ពីថ្ងៃទី ៥ ដល់ថ្ងៃទី ១៧ ខែឧសភា ឆ្នាំ ២០២៣។  

សម្ដេចតេជោ ហ៊ុន សែន ថ្លែងបែបនេះថា «លុយកាក់អាចចាយអស់ ក៏ប៉ុន្តែកេរ្ដិ៍ឈ្មោះកម្ពុជា ចាយមិនអស់ទេ…យើងរក្សាទុកឲ្យជាតិយើង ឲ្យកូនចៅជំនាន់ក្រោយយើងរាប់រយឆ្នាំតទៅទៀត ថា ស៊ីហ្គេមនៅកម្ពុជា ចាប់ផ្ដើមពីកំណែទម្រង់ក្នុងចក្ខុវិស័យមួយ ទាក់ទងជាមួយនឹងបញ្ហាជំរុញសមាហរណកម្ម នៅក្នុងក្របខ័ណ្ឌអាស៊ាន តាមរយៈនៃការដែលយើងធ្វើការដោយនិយាយតាមមួយបែបថា គឺយើងធ្វើដោយមិនគិតលុយ ការចំណាយអ្វីទាំងអស់សម្រាប់អ្នកដែលមកប្រទេសរបស់យើង»។

សម្ដេចតេជោ ហ៊ុន សែន បានថ្លែងទៀតថា ការរៀបចំព្រឹត្តិការណ៍ស៊ីហ្គេមលើកទី ៣២ ដែលកម្ពុជាធ្វើជាម្ចាស់ផ្ទះ បានក្លាយជាប្រធានបទមួយនៃស្ថាប័នសារព័ត៌មានអន្តរជាតិធំៗ រាប់ទាំងស្ថាប័ន CNN, New York Time, South China Morning Post, Channel News Asia ជាដើម បានផ្សាយល្អអំពីកម្ពុជា៕