ហេតុការណ៍រន្ធត់! រថយន្តបុករះហ្វូងមនុស្សនៅប្រទេសចិន

ហេតុការណ៍ដ៏រន្ធត់បានកើតឡើងនៅប្រទេសចិន ដោយរថយន្តមួយគ្រឿងបានបុករះហ្វូងមនុស្សដែលកំពុងហាត់សមសម្រាប់ព្រឹត្តិការណ៍ធំមួយ បណ្តាលឲ្យមានអ្នករបួសយ៉ាងតិច២០នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះកើតឡើងនៅខាងក្រៅកីឡដ្ឋានមួយក្នុងទីក្រុង Zhuhai កាលពីរាត្រីថ្ងៃចន្ទទី១១ខែវិច្ឆិកាឆ្នាំ២០២៤ ខណៈអ្នកបើកបរមានត្រកូល Fan ត្រូវចាប់ខ្លួននៅហ្នឹងកន្លែង។

តាមការបញ្ជាក់ពីអាជ្ញាធរ អ្នករបួសទាំងអស់មានខ្លះស្រាលខ្លះធ្ងន់ ហើយត្រូវបានបញ្ជូនទៅកាន់មន្ទីរពេទ្យនៅក្បែរនោះ។

ទោះបីជាយ៉ាងណាក៏ដោយ ភ្លាមៗប៉ូលិសមិនទាន់បញ្ជាក់ពីមូលហេតុដែលបុរសត្រកូល Fan បើករថយន្តបុករះមនុស្សនេះទេ ហើយក៏មិនទាន់ចង្អុលចំៗផងដែរថាតើវាជាការវាយប្រហារឬឧបទ្ទវហេតុ។

សូមបញ្ជាក់ មិនមែនជារឿងចម្លែកឡើយដែលប្រទេសចិន កើតមាន​ការ​វាយ​ប្រហារមិនរើសមុខដូចករណីនេះ។ ជាក់ស្តែងកាលពីខែតុលា បុរសអាយុ៥០ឆ្នាំម្នាក់ ត្រូវឃុំខ្លួន បន្ទាប់ពីគាត់ យកកាំបិតចាក់ក្មេងៗនៅសាលាមួយក្នុងទីក្រុងប៉េកាំង ហើយកាល​ពី​ខែ​កញ្ញា មនុស្ស​បី​នាក់​ត្រូវ​បាន​សម្លាប់​ក្នុង​ការ​វាយ​ប្រហារ​ដោយ​កាំបិតនៅ​ផ្សារ​ទំនើប​សៀងហៃ៕

អត្ថបទ៖ សុខ សុវណ្ណ

ចុចអាន៖ គ្រួសារសព​ជនរងគ្រោះ​ ដោយ​គ្រោះថ្នាក់​ចរាចរណ៍ ៥ នាក់ ទទួល​ថវិកាឧបត្ថម្ភ​ពីអាជ្ញាធរ​ខេត្ត​ក្រចេះ