លោក Johnson ៖ អង់គ្លេស អាចបញ្ជូនទ័ពទៅជួយអ៊ុយក្រែន បើអាមេរិក កាត់ជំនួយ

ក្នុងកិច្ចសម្ភាសជាមួយសារព័ត៌មាន GB News កាលពីថ្ងៃអង្គារទី១២ខែវិច្ឆិកាឆ្នាំ២០២៤ អតីតនាយករដ្ឋមន្ត្រីអង់គ្លេសលោក Boris Johnson បានព្រមានថា ទីក្រុងឡុងដ៍ មិនអាចឱបដៃឈរមើលអ៊ុយក្រែន ចាញ់រុស្ស៊ី ក្នុងសង្គ្រាមបានឡើយ ហើយអាចនឹងបញ្ជូនទ័ពទៅជួយទីក្រុងកៀវ ប្រសិនបើសហរដ្ឋអាមេរិក ពិតជាកាត់ជំនួយមែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកព្រមានចំៗថា ការកាត់ជំនួយរបស់រដ្ឋាភិបាលលោក ដូណាល់ ត្រាំ ទៅឲ្យទីក្រុងកៀវ ​ពិតជាមានហានិភ័យណាស់។ លោក ត្រាំ និងបក្សសាធារណរដ្ឋកំពុងដើរលើផ្លូវខុស ហើយបើអាមេរិកបណ្តោយឲ្យអ៊ុយក្រែនចាញ់ អង់គ្លេសត្រូវតែបង្ខំចិត្តបញ្ជូនទ័ពទៅជួយទីក្រុងកៀវហើយ។

យោងតាមលោក Johnson, ជោគជ័យរបស់រុស្ស៊ីនៅអ៊ុយក្រែន នឹងបង្កឲ្យមានវិបត្តិសន្តិសុខសម្រាប់សហរដ្ឋអាមេរិកនិងសម្ព័ន្ធមិត្តរបស់ខ្លួនជាច្រើនទៀតដូចជារដ្ឋបាល់ទិកឬហ្សកហ្ស៊ីជាដើម។ ​បរាជ័យ​របស់​អ៊ុយក្រែន​ នឹងជះឥទ្ធិពលដល់តំបន់​ប៉ាស៊ីហ្វិកហើយ ​វាអាចនឹងកើតឡើង​នៅ​សមុទ្រ​ចិន​ខាង​ត្បូង។

ការព្រមានរបស់លោក Johnson ធ្វើឲ្យគេនឹកឃើញដល់សេចក្តីរាយការណ៍កាលពីសប្តាហ៍មុនរបស់កាសែត The Telegraph ដែលលើកឡើងថា ចក្រភពអង់គ្លេស រួមជាមួយនឹងបារាំង អាចដុតភ្លើងសង្គ្រាមអ៊ុយក្រែនឲ្យកាន់តែឆេះរោល ដោយសារតែការព្យាយាមបញ្ចុះបញ្ចូលទីក្រុងវ៉ាស៊ីនតោន ឲ្យបើកដៃដល់ទីក្រុងកៀវ វាយប្រហារចូលជ្រៅទៅក្នុងប្រទេសរុស្ស៊ីជាមួយមីស៊ីលរយៈឆ្ងាយ។

ទោះបីជាយ៉ាងណាក៏ដោយ រុស្ស៊ីបានបញ្ជាក់ម្តងហើយម្តងទៀតថា ខ្លួនគ្មានផែនការវាយប្រហារអង្គការណាតូឬសមាជិកណាមួយឡើយប៉ុន្តែក៏គំរាមជាច្រើនលើកមកហើយដែរថា តាមរយៈការផ្តល់ជំនួយយោធាដល់ទីក្រុងកៀវ ប្លុកនេះកំពុងបង្កើនហានិភ័យ ប៉ះទង្គិចគ្នាដោយផ្ទាល់ជាមួយទីក្រុងមូស្គូហើយ៕

អត្ថបទ៖ សុខ សុវណ្ណ

ចុចអាន៖ ទ័ព​រុស្ស៊ី និង​កូរ៉េ​ខាងជើង ៥០ ០០០​នាក់ ត្រៀម​វាយ​ដណ្ដើម​យក​តំបន់ Kursk ពី​អ៊ុយក្រែនវិញ