ផ្លូវជនបទ៧៤%ត្រូវតភ្ជាប់ខណៈរដ្ឋចង់ពង្រឹងទៅជាថ្នល់កៅស៊ូ និងបេតុង

រដ្ឋមន្ត្រីក្រសួងអភិវឌ្ឍន៍ជនបទលោក ឆាយ ឬទ្ធិសែន បានឱ្យដឹងថាគិតរហូតមកដល់ឆ្នាំ២០២៥នេះរដ្ឋសម្រេចកសាងផ្លូវជនបទបានជាង៧៥%ទូទាំងប្រទេស ខណៈនឹងពង្រឹងការកសាងផ្លូវទៅជាកៅស៊ូ និងបេតុងបន្ថែម។

ក្នុងកិច្ចសម្ភាសន៍ស្ដីពីសមិទ្ធផលសំខាន់ៗរបស់រាជរដ្ឋាភិបាល នីតិកាលទី៧ លើវិស័យអភិវឌ្ឍន៍ជនបទលោក ឆាយ ឬទ្ធិសែន បានលើកឡើងថាផ្លូវជនបទបច្ចុប្បន្នមានប្រវែងសរុបជាង៥ម៉ឺនគីឡូម៉ែត្រភាគច្រើនជាផ្លូវគ្រួសក្រហម។ ទោះជាយ៉ាងណាលោកថាក្រសួងក៏នឹងជំរុញ​ការកសាងផ្លូវបេតុង និងកៅស៊ូនៅតាមទីជនបទផងដែរ។

បើតាម​លោក​ ឆាយ ឬទ្ធិសែន បច្ចប្បន្នមានផ្លូវបេតុងនៅជនបទប្រវែងប្រមាណ១៨០០គីឡូម៉ែត្រ និងថ្នល់កៅស៊ូជនបទមានជាង ៦៧០០គីឡូម៉ែត្រ ដែលស្មើប្រមាណ១៥%នៃផ្លូវជនបទទាំងមូល។ លោកបន្ថែមថាក្រសួងនឹងធ្វើយ៉ាងណាឱ្យនៅចុងអាណត្តិទី៧នេះសម្រេចបាន ៦ពាន់គីឡូម៉ែត្របន្ថែម ដែលអាចនឹងកើនដល់ប្រវែងសរុបជាង១ម៉ឺន៣ពាន់គីឡូម៉ែត្រ។

លោកថា៖ «ផ្លូវនេះបើយើងគិតមើលតាមការសិក្សារបស់ធនាគារពិភពលោកថាផ្លូវក្នុងប្រវែង១គីឡូម៉ែត្រនៃផ្លូវដែលប្រើប្រាស់បានគ្រប់រដូវកាលនេះអាចជួយបម្រើដល់ប្រជាពលរដ្ឋបានប្រមាណ ១ ១០៩នាក់។ អ៊ីចឹងបើយើងមានរហូតដល់១ម៉ឺន៣ពាន់គីឡូម៉ែត្រមានន័យថាផ្លូវជនបទទាំងនេះនឹងអាចជួយផ្ដល់ផលប្រយោជន៍បម្រើប្រជាពលរដ្ឋប្រមាណជា១៤លាននាក់ដែរ»។

យោងតាមច្បាប់ស្ដីពីផ្លូវថ្នល់ផ្លូវជនបទសំដៅដល់ ផ្លូវដែលភ្ជាប់ពីផ្លូវជាតិ ផ្លូវខេត្តឆ្ពោះទៅកាន់ក្រុង ទីរួមស្រុក ខណ្ឌ ទីប្រជុំជនឃុំ សង្កាត់ និងទៅភូមិ៕

អត្ថបទដោយ ហ៊ុន សិរីវឌ្ឍន៍