ប្រជាពលរដ្ឋខ្វះខាត ២២៦គ្រួសារទទួលបានអំណោយពីក្រុមហ៊ុន OCIC

ដើម្បីអបអរសាទរនាឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងខិតជិតមកដល់ដ៏ខ្លីខាងមុខនេះ លោក ផន សុភាព ប្រធានការដ្ឋានផ្នែកដោះស្រាយដីធ្លី តំណាងអ្នកឧកញ៉ា ពុង ឃាវសែ អគ្គនាយកក្រុមហ៊ុន OCIC បានផ្តល់អំណោយដល់ប្រជាពលរដ្ឋខ្វះខាត ៦០គ្រួសារ តំណាងអោយប្រជាពលរដ្ឋ ២២៦គ្រួសារ នាថ្ងៃទី៨ ខែ មេសា​​ ​ឆ្នាំ២០២៥ ។

លោក ផន សុភាព លើកឡើងថា ការចែកអំណោយទៅដល់ប្រជាពលរដ្ឋដែលមានជីវភាពខ្វះខាតនាពេលនេះមិនមែនទើបតែចែកនោះទេ គឺក្រុមហ៊ុនតែងតែគិតគូ និងចែកជូនជាច្រើនលើកច្រើនសារមកហើយ។ នេះគឺជាកម្មវិធីចែកអំណោយលើកទី៣៦ ដូច្នេះគិតដល់បច្ចុប្បន្នលោកអគ្គនាយកបានឧបត្ថម្ភគិតជាប្រាក់ទាំងអស់សរុបប្រមាណ ១,០២៩,៦៥៤,០០០ រៀល។ ប្រជាពលរដ្ឋទាំង ២២៦គ្រួសារ ដោយក្នុង ១គ្រួសារៗទទួលបានអំណោយ អង្ករ ទម្ងន់ ៣០គីឡូក្រាម និងថវិការ ៥0,000រៀល ។

លោក ផន សុភាព បញ្ជាក់ថា សព្វថ្ងៃនេះក្រុមហ៊ុន OCIC បានសហការយ៉ាងជិតស្និតជាមួយ និងរាជរដ្ឋាភិបាល សាលារាជធានីភ្នំពេញ សាលា​ខណ្ឌ​ជ្រោយ​​​ចង្វារ និងអាជ្ញាធរដែនដីដែលពាក់ពន័្ធនៅក្នុងមូលដ្ឋាន ក្នុងការដោះស្រាយគោលនយោបាយ​ជូនប្រជាពលរដ្ឋ​ដែលទទួលរងផលប៉ះពាល់នៅក្នុងគម្រោងអភិវឌ្ឍន៏ទីក្រុងជ្រោយចង្វារ ប្រកបដោយសន្តិវិធី។ ក្រៅពីនេះក្រុមហ៊ុនបានផ្តល់ការងារឲ្យប្រជាពលរដ្ឋរស់នៅតំបន់នោះមានការងារធ្វើជាច្រើននាក់ ព្រមទាំងទទួលប្រាក់ខែសមរម្យទៀតផង៕

អត្ថបទ៖ រ៉ាវុទ្ធ