ជិត២សប្តាហ៍មកនេះ ពលរដ្ឋជាច្រើនបាននាំគ្នាទៅធ្វើបច្ចុប្បន្នភាពក្នុងបញ្ជីឈ្មោះបោះឆ្នោតឆ្នាំ២០២៥

រយៈពេលជិត២សប្តាហ៍មកនេះប្រជាពលរដ្ឋជាច្រើនបាននាំគ្នាទៅធ្វើបច្ចុប្បន្នភាពទន្និន័យជីវមាត្រក្នុងបញ្ជីរឈ្មោះបោះឆ្នោត សម្រាប់ឆ្នាំ២០២៥។

លោក សេង ជី ចៅសង្កាត់វាលវង់ នៃរដ្ឋបាលខណ្ឌ៧មករា បានឱ្យដឹងថា អនុវត្តតាមគោលការណ៍របស់គណៈ​កម្មាធិការ​​ជាតិរៀបចំការបោះឆ្នោត ( គ.ជ.ប ) រដ្ឋបាលសង្កាត់វាលវង់ បានយកចិត្តទុកដាក់ក្នុងការធ្វើបច្ចុប្បន្នភាពបញ្ជីឈ្មោះរបស់ពលរដ្ឋទាំងការចុះឈ្មោះថ្មី និងការពិនិត្យផ្ទៀងផ្ទាត់ទន្និន័យ។ ក្នុងសប្តាហ៍ទី២ នៃការធ្វើបច្ចុប្បន្នភាពបញ្ជីឈ្មោះនេះដែរ ក្នុងមូលដ្ឋានសង្កាត់វាលវង់របស់លោក មានពលរដ្ឋជាច្រើនបានទទួលជ្រាបពីការផ្សព្វផ្សាយព័ត៌មានរបស់អាជ្ញាធរ និងបន្តនាំគ្នាទៅបំពេញកាតព្វកិច្ចពលរដ្ឋល្អជាបន្តបន្ទាប់។

លោក សេង ជី ចៅសង្កាត់វាលវង់បានសង្កត់ធ្ងន់ថា សម្រាប់ការបោះឆ្នោត គឺជាការចូលរួមយ៉ាងត្រឹមត្រូវព្រោះការបោះឆ្នោតរើសជ្រើសមេដឹកនាំត្រូវ គឺទទួលបានសន្តិភាព ប្រជាពលរដ្ឋរស់នៅប្រកបដោយសន្តិសុខ សេរីភាព ប្រៀបបានដូចជាអ្នកកាន់ចង្កូតរថយន្ត។

ប្រជាពលរដ្ឋដែលបានទៅធ្វើបច្ចុប្បន្នភាពបញ្ជីឈ្មោះ យល់ឃើញថា នេះជាការបំពេញកាតព្វកិច្ចក្នុងនាមពលរដ្ឋល្អក្នុងសង្គមជាតិ ពិសេសដើម្បីច្បាស់ការណ៍អំពីទន្និន័យត្រឹមត្រូវរបស់ខ្លួន សម្រាប់ការចូលរួមបោះឆ្នោតនៅថ្ងៃខាងមុខ ទាំងបោះឆ្នោតក្រុមប្រឹក្សាឃុំសង្កាត់ និងបោះឆ្នោតជ្រើសតាំងតំណាងរាស្ត្រ។

សូមបញ្ជាក់ថា យុទ្ធនាការនៃការពិនិត្យបញ្ជីឈ្មោះ និងការចុះឈ្មោះបោះឆ្នោតសម្រាប់ឆ្នាំ២០២៥នេះ គឺនឹងធ្វើឡើងរយៈពេល២៦ថ្ងៃ គិតចាប់ពីថ្ងៃទី១ ដល់ថ្ងៃទី២៦ ខែឧសភា ឆ្នាំ២០២៥ ដោយពេលព្រឹកចាប់ពីម៉ោង ៧:៣០ ដល់ម៉ោង ១១: ៣០ នាទីព្រឹក និងពេលរសៀល ចាប់ពីម៉ោង២:០០ ដល់ម៉ោង ៥:០០ នាទីរសៀល៕

អត្ថបទ៖ សុភា