Goldman៖ តម្លៃមាសអន្តរជាតិអាចកើនជិត ៥ ០០០ ដុល្លារ/អោន បើ Fed បាត់បងឯករាជ្យភាព

ធនាគារវិនិយោគអាមេរិក Goldman Sachs បាន​ព្យាករថា តម្លៃមាសអន្តរជាតិ​អាចកើនឡើងដល់ជិត ៥ ០០០ ដុល្លារ/អោន ប្រសិនបើធនាគារកណ្ដាលសហព័ន្ធអាមេរិក (Fed) ​បាត់បង់ឯករាជ្យភាពរបស់ខ្លួន ហើយវិនិយោគិនដក​ការវិនិយោគលើមូលបត្របំណុលរបស់រដ្ឋាភិបាល​ទៅទិញមាសវិញ។ ​នេះបើតាមការចុះផ្សាយរបស់សារព័ត៌មាន​ Bloomberg នាថ្ងៃព្រហស្បតិ៍នេះ។

ក្រុមអ្នកវិភាគរបស់ធនាគារ រួមមាន​ទាំងលោកស្រី Samantha Dart បាន​និយាយនៅក្នុងកំណត់ត្រាមួយ​របស់ Goldman ថា៖ «ប្រសិនបើឯករាជ្យភាពរបស់ Fed ត្រូវបានចុះខ្សោយ វាអាចនាំឱ្យមានអតិផរណាខ្ពស់ ការធ្លាក់ចុះតម្លៃភាគហ៊ុន និងសញ្ញាប័ណ្ណ ​ក៏ដូចជាការចុះខ្សោយនៃប្រាក់ដុល្លារអាមេរិក​។ ផ្ទុយទៅវិញ ក្នុង​ស្ថានភាព​បែប​នេះ មាស​ទំនង​ជា​នឹង​ឡើង​តម្លៃ​ ព្រោះវាមិន​អាស្រ័យ​លើ​​ការផ្ដល់ទំនុកចិត្តរបស់​ស្ថាប័នណាមួយ​»។

Goldman បានផ្តល់ការព្យាករផ្សេងៗគ្នា​សម្រាប់តម្លៃមាស។ ការព្យាករ​គោល គឺថា តម្លៃមាសអាចឡើងដល់ ៤ ០០០ ដុល្លារ/អោន នៅពាក់កណ្ដាលឆ្នាំ ២០២៦។ ហើយកាន់តែខ្លាំងជាងនេះ វាអាច​កើនដល់ ៤ ៥០០ ដុល្លារ/អោន ឬសូម្បីតែជិត ៥ ០០០ ដុល្លារ/អោន ប្រសិនបើវិនិយោគិនដកត្រឹមតែ ១ ភាគរយនៃសញ្ញាប័ណ្ណអាមេរិក ​ទៅវិនិយោគលើមាសវិញ។

គួរគូសបញ្ជាក់ថា តម្លៃមាសបាន​បំបែកកំណត់ត្រាខ្ពស់បំផុតក្នុងប្រវត្តិសាស្រ្តជាបន្តបន្ទាប់​ក្នុងឆ្នាំនេះ ហើយកំពុងជួញដូរនៅតម្លៃប្រហែល ៣ ៥៤០ ដុល្លារ/អោន ​គិតត្រឹមថ្ងៃព្រហស្បតិ៍​ ក្រោយ​កើនដល់ចំណុចខ្ពស់បំផុត ៣ ៥៧៨ ដុល្លារ/អោន នៅថ្ងៃពុធ។

រាប់តាំងពីដើមឆ្នាំមក តម្លៃមាសបានកើនឡើងជាង ៣០ ភាគរយ រួចទៅហើយ ដោយសារតែការទិញរបស់ធនាគារកណ្ដាល សង្រ្គាមពាណិជ្ជកម្មគយ ភាព​មិនប្រាកដប្រជានៃសេដ្ឋកិច្ច និងជម្លោះភូមិសាស្រ្តនយោបាយជាដើម។

យ៉ាងណាមិញ ក្ដីបារម្ភពីឯករាជ្យភាព​របស់ Fed ក៏ជាកត្តារួមចំណែកផងដែរ ជាពិសេសនៅពេលថ្មីៗនេះ ក្រោយ​ប្រធានាធិបតីអាមេរិក លោក ដូណាល់ ត្រាំ ដែលតែងតែជំរុញឱ្យ Fed កាត់បន្ថយអត្រាការប្រាក់នោះ បាន​ព្យាយាមប្រើអំណាចរបស់ខ្លួនម្ដងហើយម្ដងទៀត ​ដើម្បីជះឥទ្ធិពលលើការសម្រេចចិត្តរបស់ Fed។

ចុងក្រោយ​បំផុត​ លោក ត្រាំ បាន​ជំរុញទម្លាក់តំណែងទេសាភិបាលរបស់ Fed របស់លោកស្រី Lisa Cook ដោយ​ចោទមន្រ្តីជាន់ខ្ពស់រូបនេះថាជាប់ពាក់ព័ន្ធនឹង​ការឆបោកក្នុងករណីទាក់ទិញនឹង​កម្ចីទិញអចលនទ្រព្យ៕