ក្រសួងវប្បធម៌ ចុះអនុស្សរណៈ ដើម្បីអភិវឌ្ឍរចនាសម្ព័ន្ធ ដៃគូការងារប្រកបដោយនិរន្តភាព

ក្រសួងវប្បធម៌ និងវិចិត្រសិល្បៈ ចុះអនុស្សរណៈយោគយល់ ជាមួយនឹងសមាគមដើម្បីការអភិវឌ្ឍ និងការគាំទ្រឧស្សាហកម្មកែច្នៃនៃកម្ពុជា ដើម្បីអភិវឌ្ឍរចនាសម្ព័ន្ធ ដៃគូការងារប្រកបដោយនិរន្តភាព និងបរិយាបន្ន។

នៅថ្ងៃទី៧ ខែវិច្ឆិកា ឆ្នាំ២០២៣ លោកស្រី ប៉ែន មុនីមករា តំណាងក្រសួងវប្បធម៌ និងវិចិត្រសិល្បៈ បានចុះហត្ថលេខាលើអនុស្សរណៈយោគយល់គ្នារវាង ក្រសួងវប្បធម៌ និងវិចិត្រសិល្បៈ ជាមួយនឹង សមាគមដើម្បីការអភិវឌ្ឍ និងការគាំទ្រឧស្សាហកម្មកែច្នៃ នៃកម្ពុជា នៅទីស្តីការក្រសួងវប្បធម៌និងវិចិត្រសិល្បៈ។

គោលបំណង នៃការចុះអនុស្សរណៈនេះ គឺដើម្បីអភិវឌ្ឍរចនាសម្ព័ន្ធ ដៃគូការងារប្រកបដោយនិរន្តភាព និងបរិយាបន្នមួយដល់ឧស្សាហកម្មវប្បធម៌ និងច្នៃប្រតិដ្ឋនៅក្នុងប្រទេសកម្ពុជា។

បន្ថែមពីនេះ ដើម្បីពង្រឹងភាពជាដៃគូរវាងស្ថាប័នរដ្ឋ និងដៃគូឯកជនតាមរយៈការពង្រឹងសមត្ថភាព ចែករំលែកចំណេះដឹង និងផ្សព្វផ្សាយស្នាដៃសេវាកម្ម និងផលិតផល នៃឧស្សាហកម្មវប្បធម៌ និងច្នៃប្រតិដ្ឋរបស់កម្ពុជា។