សេដ្ឋកិច្ច

គយប្រមូលចំណូលបានជាង ១,៦៩៩ លានដុល្លារ ក្នុងរយៈពេល៩ខែ ថយចុះ ៦.៨%

បានផុស

២ years មុន

នៅ

ថ្ងៃសុក្រ ១៥ តុលា ២០២១

ដោយ

អគ្គនាយកដ្ឋានគយ និងរដ្ឋាករកម្ពុជា បានបង្ហាញលទ្ធផលនៃការប្រមូលពន្ធក្នុងរយៈពេល៩ខែ នៃឆ្នាំ២០២១ បានចំនួន ៦,៨៨១.៤ ប៊ីលានរៀល ស្មើនឹង ១,៦៩៩.១ លានដុល្លារអាមេរិក ស្មើនឹង ៧១.៩% នៃផែនការប្រចាំឆ្នាំដែលកំណត់ដោយច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២១ បើធៀបនឹងរយៈពេលដូចគ្នា នៃឆ្នាំ២០២០ ថយចុះប្រមាណ ៦.៨%។ នេះបើយោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជាប្រចាំខែកញ្ញា ឆ្នាំ២០២១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍បានបង្ហាញថា បើគិតតាមប្រភេទពន្ធ និងអាករ ឃើញថា អាករលើតម្លៃបន្ថែមមានចំនួន ២,៦១៧.៨ ប៊ីលានរៀល (ត្រូវជាប្រមាណ ៣៨.០% នៃចំណូលសរុប) អាករពិសេសមាន ២,៥៧០.៦ ប៊ីលានរៀល (ត្រូវជា ៣៧.៤%នៃចំណូលសរុប) ពន្ធនាំចូលមាន ១,២៤៣.៥ ប៊ីលានរៀល (ត្រូវជា ១៨.១% នៃចំណូលសរុប) អាករបន្ថែមលើផលិតផលប្រេងមាន ៣១២.០ ប៊ីលានរៀល (ត្រូវជា ៤.៥%នៃ ចំណូលសរុប) និងអាករនាំចេញ និងកម្រៃផ្សេងៗមាន ១៣៧.២ ប៊ីលានរៀល (ត្រូវជា ២%នៃចំណូលសរុប)។ បើគិតតាមក្រុមទំនិញវិញ ចំណូលពីយានយន្ត និងគ្រឿងចក្រមានចំនួន ២,៨៨២.០ ប៊ីលានរៀល (គ្របដណ្តប់ ៤១.៩% នៃចំណូលសរុប) ទំនិញចម្រុះមានចំនួន ១,៩៤៨.២ ប៊ីលានរៀល (ត្រូវជា ២៨.៣% នៃចំណូលសរុប) ផលិតផលតេលសិលាមានចំនួន ១,៦២០.៦ ប៊ីលានរៀល ស្មើនឹង ២៣.៥% នៃចំណូលសរុប និងសម្ភារសំណង់ និងកម្រៃផ្សេងៗមានចំនួន ៤៣០.៧ ប៊ីលានរៀល (ស្មើនឹង ៦.៣%នៃចំណូលសរុប)។

នៅក្នុងកិច្ចប្រជុំបូកសរុបលទ្ធផលការងារគយ និងរដ្ឋាករប្រចាំ៩ខែ ឆ្នាំ២០២១ តាមប្រព័ន្ធវីដេអូ ដែលរៀបចំឡើងកាលពីថ្ងៃទី១៤ ខែតុលា ឆ្នាំ២០២១ កន្លងទៅនេះ លោក គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានបង្ហាញពីយុទ្ធសាស្រ្តក្នុងការប្រមូលពន្ធគយដើម្បីសម្រេចបានតាម ផែនការប្រចាំឆ្នាំដែលកំណត់ដោយច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២១ ដែលក្នុងនោះរដ្ឋាបាលគយនឹងខិតខំជំរុញយុទ្ធនាការនៃការប្រមូលពន្ធ និងអាកររថយន្តគ្មានពន្ធ។

លោក គុណ ញឹម បានរម្លឹកកដល់គ្រប់អង្គភាពគយ និងរដ្ឋាករត្រូវបន្តផ្សព្វផ្សាយដល់ម្ចាស់រថយន្តគ្មានពន្ធមានស្រាប់ក្នុងប្រទេសឱ្យបានទូលំទូលាយ និងត្រូវទទួលស្វាគមន៍ម្ចាស់យានយន្តដែលស្ម័គ្រចិត្តចូលមកបំពេញកាតព្វកិច្ចពន្ធ និងអាករនាំចូលប្រកបដោយភាពរួសរាយ និងរាក់ទាក់បំផុត។ តាមការជូនដំណឹងកន្លងមកនៅក្នុងដំណាក់កាលនេះ ម្ចាស់យានយន្តដែលគ្មានពន្ធ គឺនៅទទួលការអនុគ្រោះឱ្យបង់ ប៉ុន្តែនៅឆ្នាំក្រោយសមត្ថកិច្ចនឹងចាត់វិធានការក្តៅលើរឿងនេះ៕

អត្ថបទ៖ ណារី