គយ និងពន្ធដារ ប្រមូលចំណូលបានជាង ៦ពាន់លានដុល្លារ ក្នុងឆ្នាំ ២០២២

ស្ថាប័នពីរ គឺអគ្គនាយកដ្ឋានគយ និងអគ្គនាយកដ្ឋានពន្ធដារ ប្រមូលចំណូលសរុបបានប្រមាណជាង ៦ពាន់លានដុល្លារ គិតត្រឹមថ្ងៃទី ២៩ ខែ ធ្នូ ឆ្នាំ ២០២២។

សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានមានប្រសាសន៍ថា ឆ្នាំនេះការប្រមូលពន្ធគយ និងពន្ធដារ លើសផែនការ ២៥ភាគរយ ពោលគឺ គិតត្រឹមថ្ងៃទី ២៩ ខែ ធ្នូ ពន្ធដារ សម្រេចប្រមូលពន្ធបានចំនួន ៣ ៤៣៧ លានដុល្លារ ស្មើនឹង ១២១,៩១ភាគរយ។ ដោយឡែក អគ្គនាយកដ្ឋានគយ ប្រមូលបាន ២ ៦៧០ លានដុល្លារ  ស្មើ ១០៤,១៥ភាគរយ លើសផែនការ ១២២ភាគរយ ដោយមិនទាន់គិតអំពីចំណូលសារពើពន្ធផង។ ក្នុងនោះ គ្រាន់តែវិស័យទេសចរណ៍ ទទួលបានភ្ញៀវជាង ២លាននាក់ ដោយតម្លៃទិដ្ឋការប្រមាណ ៦០លានដុល្លារ។ នេះជាការបន្ថែមរបស់សម្តេចតេជោ។

បើតាមសម្តេច ពាក់ព័ន្ធនឹងកំណើននៃចំណូលលើការប្រមូលពន្ធនេះ បានផ្តល់ឱ្យកាសដល់រាជរដ្ឋាភិបាល អភិវឌ្ឍ​ហេដ្ឋារចនាសម្ព័ន្ធនានា ជាក់ស្តែងដូចជាផ្លូវថ្នល់ជាដើម។ ជាមួយគ្នានេះ សម្តេចតេជោ ក៏បានអំពាវ​នាវដល់​អាជ្ញាធរគ្រប់លំដាប់ថា្នក់បន្តគាំទ្រវិស័យគយ និងពន្ធដារ ដើម្បីប្រមូលចំណូលកាន់តែប្រសើរថែមទៀត។ ការលើកឡើងរបស់សម្តេចតេជោ ហ៊ុន សែន បែបនេះ នៅក្នុងពិធីបើកការដ្ឋានស្តារ និងលើកកម្រិតគុណភាពផ្លូវពីរ គឺផ្លូវជាតិលេខ៣១ និងលេខ៣៣ ស្ថិតក្នុងភូមិសាស្ត្រខេត្តកំពត និងខេត្តកែប នាព្រឹកថ្ងៃទី ៣០ ខែ ធ្នូ ឆ្នាំ ២០២២៕