ពិភពលោកបង្ហាញសាមគ្គីភាព សម្រុកបញ្ជូនក្រុមសង្គ្រោះនិងជំនួយមនុស្សធម៌ ទៅមីយ៉ាន់ម៉ា

បន្ទាប់ពីគ្រោះរញ្ជួយដីកម្រិត ៧.៧ រ៉ិចទ័រវាយប្រហារមីយ៉ាន់ម៉ាយ៉ាងដំណំ ពិភពលោកបានបង្ហាញពីសាមគ្គីភាពដោយប្រទេសជាច្រើនបានបញ្ជូនក្រុមជួយសង្គ្រោះនិងជំនួយមនុស្សធម៌ ខណៈតួលេខមនុស្សស្លាប់ក្នុងគ្រោះធម្មជាតិដ៏អន្តរាយនេះកើនលើស៣ ០០០នាក់ហើយ។

– ចិន

ប្រទេសចិន បានបញ្ជូនក្រុមសង្គ្រោះដែលមានសមាជិក១១៨នាក់ មកពីអង្គការស្វែងរកនិងជួយសង្គ្រោះអន្តរជាតិរបស់ខ្លួន ភ្ជាប់ទៅជាមួយនូវគ្រឿងផ្គត់ផ្គង់ផ្នែកវេជ្ជសាស្រ្ត គ្រឿងចក្រនិងសត្វសុនខ។

– ឥណ្ឌា

ប្រទេសឥណ្ឌា បានបញ្ជូនក្រុមស្វែងរកនិងជួយសង្គ្រោះ, អ្នកជំនាញផ្នែកវេជ្ជសាស្រ្តនិងយន្តហោះព្រមទាំងកប៉ាល់ជាច្រើនគ្រឿង ដែលផ្ទុកទៅដោយសម្ភារៈសង្គ្រោះ។

– រុស្ស៊ី

ប្រទេសរុស្ស៊ីបានបញ្ជូនក្រុមជួយសង្គ្រោះនិងគ្រូពេទ្យសរុប១២០នាក់ ដើម្បីជួយក្នុងប្រតិបត្តិការស្វែងរកនិងជួយសង្គ្រោះ។

– វៀតណាម

ប្រទេសវៀតណាម បានបញ្ជូនក្រុមជួយសង្គ្រោះនិងគ្រូពេទ្យជាង១០០នាក់ រួមជាមួយនឹងជំនួយហិរញ្ញវត្ថុផងដែរ។

– កូរ៉េខាងត្បូង

ប្រទេសកូរ៉េខាងត្បូងបានផ្តល់ជំនួយហិរញ្ញវត្ថុ កងជួយសង្គ្រោះ និងឧបករណ៍សំខាន់ៗ។

– ជប៉ុន

ប្រទេសជប៉ុន បានបញ្ជូនក្រុមវាយតម្លៃនិងគ្រឿងផ្គត់ផ្គង់ជំនួយសង្គ្រោះបន្ទាន់។

– ថៃ

ប្រទេសថៃ បានបញ្ជូនកងទ័ពអាកាស ភ្ជាប់ជាមួយគ្រឿងផ្គត់ផ្គង់វេជ្ជសាស្រ្តនិងថ្នាំពេទ្យ។

– ឥណ្ឌូណេស៊ី

ប្រទេសឥណ្ឌូណេស៊ី បានប្រកាសពីផែនការបញ្ជូនក្រុមរុករកនិងជួយសង្គ្រោះ, គ្រូពេទ្យនិងក្រុមវិស្វកម្ម រួមជាមួយយន្តហោះនិងកប៉ាល់ពេទ្យ។

– កម្ពុជា

ប្រទេសកម្ពុជាបានបញ្ជូនមន្ត្រីសង្គ្រោះចំនួន២រូប។

មិនត្រឹមប៉ុណ្ណឹង ប្រទេសផ្សេងទៀត រួមទាំងម៉ាឡេស៊ី នូវែលសេឡង់ សិង្ហបុរី ហ្វីលីពីន និងកោះតៃវ៉ាន់ ក៏បានផ្តល់ជំនួយ និងការគាំទ្រផងដែរ។

សូមជម្រាបថា កិច្ចខិតខំប្រឹងប្រែងអន្តរជាតិទាំងនេះ គឺមានគោលបំណងពង្រឹងសមត្ថភាពរបស់ប្រទេសមីយ៉ាន់ម៉ាក្នុងការឆ្លើយតបទៅនឹងគ្រោះមហន្តរាយនិងផ្តល់ជំនួយដែលត្រូវការជាចាំបាច់ដល់សហគមន៍ដែលរងផលប៉ះពាល់៕

អត្ថបទ៖ សុខ សុវណ្ណ

ចុចអាន៖ មីយ៉ាន់ម៉ា៖ ទឹក៤ដប​​ជួយ​ក្មេងស្រី​​ឲ្យរស់​ ទោះ​ជាប់ក្រោម​គំនរបាក់បែករហូត​៥០ម៉ោង