នៅក្នុងឆ្នាំ ២០២២ កម្ពុជា រកចំណូលបានពីការនាំចេញទំនិញទៅកាន់ទីផ្សារអន្តរជាតិប្រមាណ ២២ពាន់លានដុល្លារ កើនឡើង១៦.៤% បើធៀបរយៈពេលដូចគ្នា កាលពីឆ្នាំ២០២១។ នេះបើយោងតាមរបាយការណ៍​របស់អគ្គនាយក​ដ្ឋានគយ និងរដ្ឋាករកម្ពុជា។

របាយការណ៍ដដែល បានបង្ហាញថា «ចាប់ពីខែមករា ដល់ខែធ្នូ ឆ្នាំ២០២២ កម្ពុជា នាំចេញទំនិញក្នុងតម្លៃ ២២ ៤៨២ លានដុល្លារ កើនឡើង ១៦.៤% បើធៀបនឹងរយៈពេលដូចគ្នាកាលពីឆ្នាំមុន ដែលតម្លៃ ១៩ ៣០៨ លានដុល្លារ»។

ក្នុងនោះ កម្ពុជាបាននាំចេញទំនិញច្រើនជាងគេ ទៅទីផ្សារសហរដ្ឋអាមេរិក ដោយសម្រេចបានជាងជិត ៩ពាន់លានដុល្លារ ខណៈវៀតណាម ស្ថិតនៅលំដាប់ទី២ ដែលបានកម្ពុជា បានចេញទំនិញក្នុងតម្លៃជាង ២ពាន់លានដុល្លារ និងនាំចេញ​ទៅ​ចិនជាង ១២០០លានដុល្លារ។

ចំណែកវិស័យកាត់ដេរសម្លៀកបំពាក់ កម្ពុជាបាននាំចេញក្នុងតម្លៃជាង ៩ពាន់លានដុល្លារ , ម៉ាស៊ីន និងឧបករណ៍​អគ្គិសនី​តម្លៃជិត ២ពាន់លានដុល្លារ កើនឡើង ៨៤.៨%, គ្រាប់ធញ្ញជាតិចំនួនជាង ១២០០លានដុល្លារ ថយចុះ៣.៧% និងស្បែកជើងចំនួន ១៧​០០លានដុល្លារ កើនឡើង២៤.៨%​​។

ដោយឡែក កម្ពុជា ក៏បាននាំចូលទំនិញមកវិញក្នុងតម្លៃ ២៩ ៩៤១ លានដុល្លារ កើនឡើង ៤.៣% ដែលធ្វើឱ្យទំហំ​ពាណិជ្ជកម្ម​រវាងកម្ពុជា និងទីផ្សារអន្តរជាតិ កើនឡើង ៥២ ៤២៤លានដុល្លារ កើនឡើង ៩.២% ផងដែរ៕