Connect with us

សេដ្ឋកិច្ច

ឯកអគ្គរដ្ឋទូត​ចិន៖ សេដ្ឋកិច្ច និងពាណិជ្ជកម្ម ចិន-កម្ពុជា កើនឡើង ទោះ​ជួបវិបត្តិកូវី​ដ-១៩

បានផុស

នៅ

លោក Wang Wentian ឯកអគ្គរដ្ឋទូត នៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា បានអះអាងថា ​កិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងប្រទេស​ចិន និង​កម្ពុជា​​មានកំណើន​លំនឹងថេរ និងមានសុខុមាលភាពជាលំដាប់ ហើយក្រោមបរិបទជំងឺកូវីដ-១៩ កិច្ចសហប្រតិបត្តិ​ការសេដ្ឋកិច្ច និងពាណិជ្ជកម្មរវាងប្រទេសទាំងពីរ ​មានលក្ខណៈកើនឡើងទោះបីជួបបញ្ហាកូវី​ដ-១៩ក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Wang Wentian លើកឡើងបែបនេះ នៅក្នុង​សិក្ខាសាលាពិគ្រោះយោបល់ថ្នាក់ជាតិស្តីពី “ការទូតសេដ្ឋកិច្ចក្នុងគន្លងប្រក្រតីភាពថ្មី” ក្រោមមូលនិធិពិសេស នៃកិច្ចសហប្រតិបត្តិការមេគង្គ-ឡានឆាង នាថ្ងៃទី២៧ ខែមិថុនា ឆ្នាំ២០២២ នេះ ​នៅសណ្ឋាគារ Hayatt Regency រាជធានីភ្នំពេញ។​

លោកលើកឡើងថា ឆ្នាំ២០២១ ទំហំពាណិជ្ជកម្មរវាងចិន និងកម្ពុជាសម្រេចបានគោលដៅ​ ១០ពាន់លានដុល្លារអាមេរិកមុនការគ្រោងទុក ដែលឈានដល់ ១១ ១៩៤ ពាន់លាន​ដុល្លារអាមេរិក កើនឡើង ៣៨ ភាគរយ បើធៀបនឹងរយៈពេលដូចគ្នាកាលពីឆ្នាំ២០២០។

បើតាមលោកឯកអគ្គរដ្ឋទូត​ ក្នុងរ​យៈពេលដូចគ្នានេះ​ដែរ កម្ពុជា​បានទាក់​ទាញការវិនិយោគចិនមានចំនួន ២,៣២ ពាន់លាន ដុល្លារអាមេរិក មានកំណើនជិត ៧០ភាគរយ បើធៀបនឹងរយៈពេលដូចគ្នាកាលពីឆ្នាំ២០២០ កា​រវិនិយោគចិនមានចំនួន ៥៣,៤ ភាគរយ​ នៃចំនួនវិនិយោគសរុប បានបន្តក្លាយជាប្រភពវិនិយោគ ធំជាងគេសម្រាប់កម្ពុជា។ ចាប់តាំងពីដើម​ឆ្នាំ២០២២នេះមក លទ្ធផលនៃកិច្ចសហ​ប្រតិបត្តិការសេដ្ឋកិច្ច និងពាណិជ្ជកម្មរវាងប្រទេសទាំងពីរ​មានលក្ខណៈលេចធ្លោ។ ក្នុងត្រីមាសទី១ ការវិនិយោគផ្ទាល់ មិនមែនហិរញ្ញវត្ថុរបស់ចិននៅកម្ពុជាមានចំនួន ២០៦ លាន ដុល្លារអាមេរិក មានកំណើន ៣៥,២ ភាគរយ​ បើធៀបនឹងរយៈពេលដូចគ្នាកាលពីឆ្នាំ២០២១។

ដោយឡែកទំហំពាណិជ្ជកម្មរវាងចិន និងកម្ពុជាក្នុងរយៈពេលប្រាំខែដំបូងមានចំនួនឈានដល់ ៤ ៩៩០ ពាន់លានដុល្លារអាមេរិក មានកំណើន ២៦,១ ភាគរយ​ បើធៀបនឹងរយៈពេលដូចគ្នាកាលពីឆ្នាំ២០២១ ចិននៅតែបន្តជាដៃគូពាណិជ្ជកម្មធំបំផុតសម្រាប់កម្ពុជា។ បន្ទាប់ពី​មានការនាំចូលកសិផលកម្ពុជាចូលទៅកាន់ទីផ្សារចិន ដែលក្នុងនោះមានដូចជា ចក ស្វាយ និងជលផលជាដើម ហើយត្រីបា​កម្ពុជាគ្រោងនឹងបញ្ចប់នីតិវិធីសម្រាប់ការនាំចេញទៅ កាន់ប្រទេសចិនជាផ្លូវការនាពេលខាងមុខនេះ។

លោក Wang Wentian ​អះអាងទៀតថា ​សកម្មភាព​​ខាងលើនេះបានឆ្លុះបញ្ចាំងពីភាពធន់ដ៏រឹងមាំ និងការបំពេញឱ្យគ្នាទៅ វិញទៅមកលើកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងប្រទេសទាំងពីរ បាន​ក្លាយជាផ្នែកមួយដ៏សំខាន់ និងជាប្រភពកម្លាំងរស់រវើកក្នុងការស្តារសេដ្ឋកិច្ចឡើងវិញ និង​កំណើនសេដ្ឋកិច្ចនៅក្នុងតំបន់៕

អត្ថបទ៖ កោះកែវ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម