ព័ត៌មានអន្ដរជាតិ

១៩ ថ្ងៃដើមខែមករា ថៃទទួលភ្ញៀវទេសចរបរទេស ២,១ លាននាក់

បានផុស

២ ខែ មុន

នៅ

ថ្ងៃពុធ ២២ មករា ២០២៥

ដោយ

ក្រសួងទេសចរណ៍ និងកីឡាថៃ បានឱ្យដឹងកាលពីថ្ងៃអង្គារថា ក្នុងរយៈពេល ១៩ ថ្ងៃដើមខែមករា ប្រទេសថៃបានទទួលភ្ញៀវទេសចរបរទេសប្រមាណជាង ២,១៣ លាននាក់ ដោយកើនឡើងរហូតដល់ ១៨,៦៣ ភាគរយ ធៀបនឹងរយៈពេលដូចគ្នាកាលពីឆ្នាំមុន។ នេះបើតាមការចុះផ្សាយរបស់កាសែត The Nation នាថ្ងៃពុធនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមក្រសួង ការមកដល់របស់ភ្ញៀវទេសចរទាំងនេះ បានបង្កើតចំណូលប្រមាណ ១០៧,៣៧ ប៊ីលានបាត (៣,១៧ ប៊ីលានដុល្លារ) សម្រាប់អាជីវកម្មថៃ។

ចិននាំមុខគេលើប្រភពលំហូរទេសចរបរទេសសម្រាប់ថៃ ដោយមានភ្ញៀវប្រមាណជាង ៣៥៤ ០០០ នាក់ ហើយបន្ទាប់មកគឺម៉ាឡេស៊ី (ជាង ២១៦ ០០០ នាក់) រុស្ស៊ី (ជាង ១៦៥ ០០០នាក់) កូរ៉េខាងត្បូង (ជាង ១២៤ ០០០ នាក់) និងឥណ្ឌា (ជាង ១១៧ ០០០ នាក់)។

រដ្ឋមន្ត្រីក្រសួងទេសចរណ៍ និងកីឡាថៃ លោក Sorawong Thienthong បានរាយការណ៍ថា សប្តាហ៍មុន (ថ្ងៃទី ១៣-១៩ ខែមករា) ការមកដល់នៃភ្ញៀវបានកើនឡើង ២,២៧ ភាគរយ ធៀបនឹងសប្ដាហ៍មុនមួយទៀត។ ក្នុងនោះ ការមកដល់របស់ភ្ញៀវទេសចរចិន មានរហូតដល់ ៩,២៦ ភាគរយ ដោយសារតែអំណោយផលនៃកិច្ចព្រមព្រៀង «លើកលែងទិដ្ឋាការអចិន្ត្រៃយ៍» រវាងរដ្ឋាភិបាលថៃ និងចិន។

លោក Sorawong បានលើកឡើងផងដែរថា និន្នាការទេសចរណ៍កើនឡើងនៅឆ្នាំនេះ ត្រូវបានគាំទ្រដោយការបង្កើនសមត្ថភាពកៅអីរបស់ក្រុមហ៊ុនអាកាសចរណ៍ និងគោលនយោបាយធ្វើដំណើររបស់រដ្ឋាភិបាល រួមទាំងការលើកលែងទិដ្ឋាការសម្រាប់ប្រទេសមួយចំនួនជាដើម។

គួរគូសបញ្ជាក់ថា ថៃបានកំណត់គោលដៅទាក់ទាញភ្ញៀវទេសចរបរទេសចំនួន ៤០ លាននាក់ និងចំណូលពីទេសចរណ៍ចំនួន ៣ ទ្រីលានបាតក្នុងឆ្នាំ ២០២៥។ ក្នុងនោះផងដែរ ថៃកំណត់ទាក់ទាញភ្ញៀវទេសចរចិនឱ្យបានចន្លោះពី ៨,៨-៩ លាននាក់។

ខណៈអាជ្ញាធរថៃនៅតែមានសុទិដ្ឋិនិយមលើកំណើនភ្ញៀវទេសចរបរទេស រួមទាំងភ្ញៀវទេសចរចិន គេក៏ឃើញមានការព្រួយបារម្ភខ្លាំងក្លាផងដែរ ជុំវិញករណី «ជួញដូរមនុស្ស» ពាក់ព័ន្ធនឹងតួសម្ដែងចិនដែលធ្វើដំណើរមកថៃកាលពីដើមខែមករា ហើយបាត់ខ្លួននៅព្រំដែនជាប់មីយ៉ានម៉ា មុនពេលរកឃើញវិញនៅកន្លែងមជ្ឍមណ្ឌលប្រតិបត្តិការឆបោកអនឡាញ នៅមីយ៉ាន់ម៉ា។

តាមការចុះផ្សាយរបស់កាសែត The Nation កាលពីថ្ងៃអង្គារ ប្រធានអាជ្ញាធរទេសចរណ៍ថៃ (TAT) អ្នកស្រី Thapanee Kiatphaibool រាយការណ៍ថា ភ្ញៀវទេសចរចិនប្រហែល ១០ ០០០ នាក់បានលុបចោលការមកលេងថៃរបស់ខ្លួនមកទល់ពេលនេះ។ ស្ថានការណ៍នេះកាន់តែធ្ងន់ធ្ងរឡើងៗដោយការផ្សព្វផ្សាយលើបណ្ដាញសង្គមជាអវិជ្ជមាននៅក្នុងប្រទេសចិន ជាពិសេសទាក់ទងនឹង «ករណីជួញដូរមនុស្ស និងសកម្មភាពឆបោក» នៅក្នុងប្រទេសថៃ។

ជុំវិញបញ្ហានេះផងដែរ ប្រធានសមាគមសណ្ឋាគារថៃ (THA) លោក Thienprasit Chaiyapatranun បានឱ្យដឹងថា ភ្ញៀវទេសចរបរទេសបានលុបចោលការកក់បន្ទប់ជាង ១២ ៤០០ នៅទូទាំងប្រទេស «មកត្រឹមពេលនេះក្នុងខែនេះ» ដោយក្នុងនោះរួមមានពីភ្ញៀវចិន ៤ ៥៧២ បន្ទប់ និងភ្ញៀវអន្តរជាតិផ្សេងៗទៀត ៧ ៨៥៦ បន្ទប់៕