ព័ត៌មានអន្ដរជាតិ

ផលិតកម្មរថយន្តថៃ បន្តធ្លាក់ចុះជាង ១០ ភាគរយ នៅខែកុម្ភៈ

បានផុស

៣ ខែ មុន

នៅ

ថ្ងៃអង្គារ ២៥ មីនា ២០២៥

ដោយ

សហព័ន្ធឧស្សាហកម្មថៃ បានឱ្យដឹងនៅថ្ងៃអង្គារនេះថា ផលិតកម្មរថយន្តនៅក្នុងប្រទេសថៃបានធ្លាក់ចុះ ១៣,៦២ ភាគរយ កាលពីខែកុម្ភៈ ធៀបនឹងរយៈពេលដូចគ្នាកាលពីឆ្នាំមុន មកនៅត្រឹម ១១៥ ៤៨៧ គ្រឿង។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សហព័ន្ធបានឱ្យដឹងថា មូលហេតុចម្បងនៃបញ្ហានេះ គឺបណ្ដាលមកពីការធ្លាក់ចុះនៃការលក់ក្នុងស្រុក និងការនាំចេញទៅក្រៅប្រទេស ចំពេលមានភាពស្រពិចស្រពិលនៃសេដ្ឋកិច្ចជាច្រើន។

វាគឺជាការធ្លាក់ចុះខែទី ១៩ ជាប់ៗគ្នា និងជាការបន្តពីការធ្លាក់ចុះ ២៤,៦៣ ភាគរយ កាលពីខែមករា។ កន្លងមក អ្នកជំនាញបានគូសបញ្ជាក់ថា ការធ្លាក់ចុះនៃការលក់ក្នុងស្រុកបណ្ដាញមកពីបញ្ហាបំណុលគ្រួសារខ្ពស់ និងការរឹតត្បឹតលើកម្ចីទិញរថយន្តរបស់ភ្នាក់ងារហិរញ្ញវត្ថុជាដើម។ ការនាំចេញធ្លាក់ចុះវិញ បណ្ដាលមកពីការប្រកួតប្រជែងកាន់តែខ្លាំងពីក្រុមហ៊ុនចិន និងកត្តាផ្សេងៗទៀត។

គួរគូសបញ្ជាក់ថា ថៃគឺជាមជ្ឈមណ្ឌលផលិតរថយន្តដ៏ធំបំផុតនៅអាស៊ីអាគ្នេយ៍ និងជាមូលដ្ឋាននាំចេញសម្រាប់ក្រុមហ៊ុនផលិតរថយន្តកំពូលមួយចំនួនរបស់ពិភពលោក រួមទាំង Toyota និង Honda ផងដែរ៕