បំបែកកំណត់ត្រាទៀតហើយ! ២៤ម៉ោងចុងក្រោយ ឥណ្ឌាមានអ្នកស្លាប់ដោយសារកូវីដ ដល់ទៅជាង៤,០០០នាក់

នៅថ្ងៃសៅរ៍ទី៨ខែឧសភានេះ ប្រទេសឥណ្ឌាបានកត់ត្រាអ្នកស្លាប់ថ្មីដោយសារជំងឺកូវីដ-១៩ ជាង ៤,០០០នាក់ក្នុងមួយថ្ងៃ ជាលើកដំបូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំនួនអ្នកស្លាប់ថ្មី ៤,១៨៧នាក់ បាននាំឲ្យចំនួនអ្នកស្លាប់សរុបរបស់ប្រទេសឥណ្ឌាកើនឡើងដល់ ២៣៨,២៧០នាក់ គិតចាប់តាំងពីរោគរាតត្បាតផ្ទុះឡើង។ ការឆ្លងថ្មីចំនួន ៤០១,០៧៨ករណីទៀត ត្រូវបានកត់ត្រាក្នុងរយៈពេល២៤ម៉ោងចុងក្រោយ ដែលធ្វើឲ្យចំនួនករណីសរុបកើនដល់ជិត ២១.៩លានករណី។

ទោះបីជាយ៉ាងណាក៏ដោយ ក្រុមអ្នកជំនាញបានសម្តែងការសង្ស័យអំពីចំនួនអ្នកស្លាប់ផ្លូវការ ហើយពួកគេនិយាយថា ប្រទេសឥណ្ឌាមិនទាន់ឈានដល់ចំណុចកំពូលនៃការឆ្លងនៅឡើយទេ រហូតដល់ចុងខែឧសភាឯណោះ។

ថ្មីបើស្ថានភាពនៅតាមទីក្រុងធំៗដូចជា ញូវដែលីនិងមុមបៃ បច្ចុប្បន្ន ហាក់ដូចជាថមថយបន្តិចដោយសារតែការបញ្ជូនអុកស៊ីសែនបន្ថែមនិងគ្រែមន្ទីរពេទ្យថ្មីៗទៅទីនោះក៏ដោយ ឥឡូវនេះជំងឺកូវីដ-១៩ កំពុងរីករាលដាលយ៉ាងលឿននៅក្នុងរដ្ឋនិងតំបន់ជនបទ។

រដ្ឋ Karnataka បានដាក់ចេញនូវវិធានការបិទរយៈពេលពីរសប្តាហ៍នៅទូទាំងរដ្ឋ ចាប់ពីថ្ងៃចន្ទទៅ ក្នុងគោលបំណងបញ្ឈប់ការរីករាលដាលនៃវីរុសនេះ៕

ប្រែសម្រួលដោយ៖ Vann Vann

ប្រភព៖ CNA