កូវីដ-១៩

បុរសម្នាក់នៅខេត្តព្រៃវែង បានស្លាប់ដោយសារជំងឺកូវីដ-១៩

បានផុស

៤ years មុន

នៅ

ថ្ងៃព្រហស្បតិ៍ ១៣ ឧសភា ២០២១

ដោយ

បុរសម្នាក់បានស្លាប់បាត់បង់ជីវិត នៅក្នុងមន្ទីរពេទ្យបង្អែកខេត្តព្រៃវែង កាលពីវេលាម៉ោង៤និង៥១ នាទី ល្ងាចថ្ងៃទី១២ ខែឧសភានេះ។

យោងតាមរបាយការណ៍របស់មន្ទីរសុខាភិបាលខេត្តព្រៃវែងបានបញ្ជាក់ថា អ្នកជំងឺដែលបានស្លាប់បាត់បង់ជីវិតនេះមានឈ្មោះ ស៊ីនួន សារ៉ាក់ ភេទប្រុសអាយុ៣៧ឆ្នាំមានទីលំនៅក្នុងភូមិព្រៃកំពែង ឃុំព្រៃកណ្ដៀង ស្រុកពាមរក៍ខេត្តព្រៃវែង។

អ្នកជំងឺបានចូលមកសម្រាកព្យាបាលនៅក្នុងមន្ទីរពេទ្យខេត្តព្រៃវែង នៅវេលាម៉ោង១១និង៣០នាទីយប់ ថ្ងៃទី១០ ខែឧសភា ឆ្នាំ២០២១។ ពេលចូលមកដល់ក្រុមគ្រូពេទ្យពិនិត្យឃើញថា គាត់មានអាការៈធ្ងន់ធ្ងរ ហត់ដង្ហក់ខ្លាំង ក្តៅខ្លួន និងក្អកខ្លាំង ហើយក្រុមគ្រូពេទ្យ បានខិតខំសង្គ្រោះអស់ពីសមត្ថភាពនៅតែមិនអាចជួយសង្គ្រោះបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍របស់អាជ្ញាធរមូលដ្ឋានបានបញ្ជាក់ថា ឈ្មោះ ស៊ីនួន សារ៉ាក់ នេះគឺជាកម្មករសំណង់នៅគីឡូម៉ែត្រលេខ៧ ក្នុងសង្កាត់ច្រាំងចំរេះ ខណ្ឌឬស្សីកែវ រាជធានីភ្នំពេញ ហើយបានវិលត្រឡប់មកដល់ស្រុកកំណើតវិញកាលពីថ្ងៃទី១០ ខែឧសភា ហើយនៅយប់ថ្ងៃដដែលគាត់មានអាការៈ ក្តៅខ្លួនខ្លាំង ក្អកខ្លាំង ហត់ខ្លាំង ទើបក្រុមគ្រួសារបញ្ជូនទៅកាន់មន្ទីរពេទ្យបង្អែកខេត្តព្រៃវែងទាំងយប់។ រហូតមកដល់ល្ងាចថ្ងៃទី១២ ខែឧសភានេះ ក៏បានស្លាប់បាត់បង់ជីវិតដោយសារជំងឺកូវីដ១៩ ហើយត្រូវបានក្រុមគ្រូពេទ្យនិងអាជ្ញាធររៀបចំយកទៅធ្វើការបូជាសពទាំងយប់តែម្ដង។

គួរបញ្ជាក់ផងដែរថា មួយរយៈពេលចុងក្រោយនេះ ខេត្តព្រៃវែង មានបងប្អូនប្រជាពលរដ្ឋមួយចំនួនធំ បាននាំគ្នាធ្វើដំណើរវិលត្រឡប់ពីភ្នំពេញ ចូលមកកាន់ស្រុកកំណើត នៅក្នុងទឹកដីខេត្តព្រៃវែង ហើយពួកគាត់ទាំងនោះមួយចំនួនបានរកឃើញមានវិជ្ជមានជំងឺកូវីដ១៩ ហើយត្រូវបានក្រុមគ្រូពេទ្យជំនាញនាំយកទៅព្យាបាលនៅក្នុងមន្ទីរពេទ្យជាបន្តបន្ទាប់ ជាមួយគ្នានេះក៏បានធ្វើឱ្យក្រុមគ្រួសារសាច់ញាតិ ត្រូវជាប់ពាក់ព័ន្ធ នឹងត្រូវនាំយកទៅធ្វើចត្តាឡីស័កជាច្រើននាក់ផងដែរ ដូច្នេះហើយទើបអាជ្ញាធរខេត្តសូមអំពាវនាវដល់បងប្អូនប្រជាពលរដ្ឋមេត្តាមានការប្រុងប្រយ័ត្នឲ្យបានខ្ពស់អនុវត្តតាមវិធានការ៣ការពារ ៣កុំ ហើយក្នុងករណីឃើញមានអ្នកមកពីខាងក្រៅដោយមានការសង្ស័យ សូមរាយការណ៍ជាបន្ទាន់មកកាន់អាជ្ញាធរមូលដ្ឋានដើម្បីឲ្យមន្ត្រីជំនាញអាចចាត់វិធានការបានទាន់ពេលវេលា កុំឲ្យជំងឺនេះឆ្លងរាលដាលនៅក្នុងសហគមន៍យើងតទៅទៀត៕

អត្ថបទ ៖ សៅគ្រី