អ្នកគ្រប់គ្រងផ្ទាល់ Pinky បង្ហោះសាររ៉ាយរ៉ាប់ពីនាង ចំថ្ងៃខួបកំណើតរបស់ខ្លួន

ចំពោះករណីតារាស្រី Pinky Savika ត្រូវបានចាប់ខ្លួនពាក់ព័ន្ធនឹងការឆបោកប្រាក់ជាង ៥៣លានដុល្លារ បាននិងកំពុងទាក់ទាញចំណាប់អារម្មណ៍មហាជនជាច្រើន ក្នុងនោះមនុស្សដែលស្និទ្ធនឹងរូបនាង ត្រូវបានមហាជនជំរុញឱ្យចូលជួយ Pinky ស្របពេលដែលតារាស្រីរូបនេះ កំពុងជាប់នៅក្នុងពន្ធនាគារ។

ទន្ទឹមនឹងការជំរុញពីមហាជន ដោយហេតុថាគ្មានមេធាវី ឬមនុស្សជិតដិតណាចេញមុខធានាខ្លួនឱ្យចេញក្រៅឃុំ ស្រាប់តែ Tae ដែលជាអ្នកចាត់ការផ្ទាល់ខ្លួនរបស់ Pinky អស់រយៈពេល ​២៨ឆ្នាំហើយនោះ បានចេញមកបង្ហោះសារវែងអន្លាយជាលើកដំបូង ចំខួបកំណើតរបស់លោក បន្ទាប់ពីរឿងអាស្រូវរបស់ Pinky ផ្ទុះឡើង។​

ក្នុង​នោះ​លោក​បាន​បង្ហោះ​រូបថត អមជាមួយ Caption រ៉ាយរ៉ាប់ពីរឿងរ៉ាវរបស់ Pinky នៅលើ Instagram ថា តាមពិតរឿងវាមានហេតុ និងផលរបស់វា។ ដូច្នោះគ្រប់គ្នាត្រូវជឿដោយការពិចារណា ដោយសារនៅមានឯកសារផ្សេងទៀតដែលមិនទាន់បង្ហាញនោះទេ ​ហើយពេលនេះ Pinky មិនអាចចេញមកនិយាយអ្វីឡើយ ព្រោះ​បើ​​និយាយចេញ​ទៅអាចខុសឆ្គង ​គេ​នឹងចោទប្រកាន់ថា​បំភ្លៃ ឬអាចខឹងសម្បារនឹងនាងបន្ថែមទៀត។

បន្ថែមពីលើនេះ Tae បានជូនពរគ្រប់គ្នាឱ្យជួបសំណាងល្អ និងសង្ឃឹមផងដែរថា រឿងរបស់ Pinky នឹងវិវត្តប្រសើរឡើង ព្រោះគ្មាននរណាដែលមិនធ្លាប់ធ្វើខុសឡើយ មនុស្សម្នាក់ៗសុទ្ធតែមានកំហុសដោយអចេតនាគ្រប់ពេល៕

ប្រែសម្រួល៖ សន្យា

ចុចអាន៖ មិត្តជិតស្និទ្ធ ទម្លាយស្ថានភាព Pinky នៅក្នុងពន្ធនាគារ