បវរកញ្ញាតំណាងកម្ពុជា ឆន ស្រីណេត ចេញទៅប្រកួតMiss Tourism International ថ្ងៃនេះ

ដូចការគ្រោងទុកបវរកញ្ញា ឆន ស្រីណេត ពេលនេះបានធ្វើដំណើរចាកចេញពីប្រទេសកម្ពុជាឆ្ពោះទៅកាន់ប្រទេសម៉ាឡេសុីហើយនៅព្រឹកថ្ងៃព្រហស្បតិ៍ទី១០ ខែវិច្ឆិកា ឆ្នាំ២០២២ ដើម្បីចូលរួមការប្រកួតលើឆាកអន្តរជាតិក្នុងកម្មវិធី Miss Tourism International 2022។

ដំណើរចេញទៅប្រកួតលើឆាកអន្តរជាតិរបស់បវរកញ្ញាតំណាងកម្ពុជា គឺកញ្ញា ឆន ស្រីណេត នៅព្រឹកនេះគេសង្កេតឃើញមានការចូលរួមជូនដំណើរផងដែរពីសំណាក់អ្នកគាំទ្រ និងបងប្អូនមិត្តភក្តិនៅឯអាកាសយានដ្ឋានអន្តរជាតិភ្នំពេញ។ក្នុងនោះក៏មានការជូនពរ និងលើកទឹកចិត្តដល់កញ្ញា ឆន ស្រីណេត ក្នុងការចេញទៅប្រកួតលើឆាកអន្តរជាតិនាពេលនេះផងដែរ។

ចំណែកឯសាមីខ្លួនកញ្ញា ឆន ស្រីណេត មុនពេលចាកចេញទៅប្រកួតនៅប្រទេសម៉ាឡេស៊ីក្នុងកម្មវិធីMiss Tourism International 2022នេះដែរ នាងក៏បានបញ្ជាក់យ៉ាងខ្លីថា សម្រាប់នាងបានត្រៀមខ្លួនរួចរាល់ហើយសម្រាប់ការចេញ​ទៅប្រកួតលើកនេះ។ យ៉ាងណាមិញ ស្រីណេត កន្លងមកបានក៏ក្លាយជានារីមួយរូបដ៏លេចធ្លោក្នុងចិត្តមហាជនគ្រប់មជ្ឈដ្ឋាន ខណ:ដែលបវរកញ្ញារូបនេះ គឺពោពេញដោយសមត្ថភាពឆ្លាតវ័យ និងរូបសម្រស់ស្រស់ស្អាតគួរទាក់ទាញខ្លាំង៕

អត្ថបទ៖ ចាន់រ៉ា