ទីបំផុតរកឃើញ ម្ចាស់ពាន មហោស្រពភាពយន្តជាតិខ្នាតខ្លីកម្ពុជាលើកទី៣

មហោស្រពជាតិភាពយន្តខ្នាតខ្លីកម្ពុជាលើកទី៣ បានរកឃើញ​អ្នក​ដឹកនាំ​រឿង​ខ្លី​វ័យក្មេងឆ្នើម​ៗហើយ។ គណៈមេប្រយោគវគ្គផ្តាច់ព្រ័ត្រចំនួន ៧រូប បានពិនិត្យវាយតម្លៃស្នាដៃភាពយន្តខ្លីលេចធ្លោចំនួន ៦ រឿងចុងក្រោយ ដើម្បីជ្រើសរើសផ្តល់ពានរង្វាន់ប្រចាំមហោស្រព និងពានរង្វាន់លើកទឹកចិត្ត។ ភាពយន្តខ្លីទាំង៦ រឿងនោះ មានដូចជារឿង “ជីវិតស្នេហ៍សុខសាន្ត” “សំឡេងរាត្រី” “The keyboard”​ “ក្ដីស្រឡាញ់ដែលអ្នកផ្ដល់ឱ្យ” “បាត់បង់ខ្លួនឯង” និងរឿង “មុនពេលបាត់”។

ជយលាភីលេខ១ ពានរង្វាន់មាស គឺបានទៅលើអ្នកដឹកនាំរឿង អ្នកនាង សុធា អ៊ីណេស ភាពយន្តខ្លី “ជីវិតស្នេហ៍សុខសាន្ត” ទទួលបានពានមាសមួយ អមដោយថវិកា ១២ លានរៀល។

ជយលាភីលេខ២ បានទៅលើ លោក សាង ច័ន្ទវិសាល តាមរយៈភាពយន្ត “ក្ដីស្រឡាញ់ដែលអ្នកផ្ដល់ឱ្យ”  ទទួលបានពានប្រាក់មួយអមដោយថវិកា ៨ លានរៀល។

ជយលាភីលេខ៣ បានទៅលើ លោក ជ័យ វិសាល តាមរយៈភាពយន្ត “The keyboard” ​ទទួលបានពានសំរឹទ្ធមួយ និងថវិកា ៤ លានរៀល។

ក្រៅពីនេះក៏មានផលិតករវ័យក្មេងជាច្រើនរូបទៀតបានទទួលពានរង្វាន់ពិសេសពីគណៈកម្មការ និងការផលិតមាតិកាល្អបំផុត និងទទួលបានពានរង្វាន់លើកទឹកចិត្តចំនួន ៥ ផ្សេងទៀត។

គួរបញ្ជាក់ថា មហោស្រពជាតិភាពយន្តខ្នាតខ្លីកម្ពុជា ឆ្នាំ២០២២ បានរៀបចំឡើងពីថ្ងៃទី១៦ ដល់ថ្ងៃទី២០ ខែធ្នូ ឆ្នាំ២០២២ ដែលមានស្នាដៃភាពយន្តខ្នាតខ្លីចំនួន ៣៥ចំណងជើង ចូលរួមប្រកួតប្រជែង និងមានការចាក់បញ្ចាំងជូនសាធារណជនទស្សនាដោយសេរីនៅរោងភាពយន្តចំនួន៨ ក្នុងរាជធានីភ្នំពេញ៕