ប្រធានាធិបតីអ៊ីរ៉ង់ប្ដេជ្ញាកសាងរោងចក្រនុយក្លេអ៊ែរឡើងវិញ ជាមួយនឹងថាមពលកាន់តែខ្លាំង

ប្រធានាធិបតីអ៊ីរ៉ង់លោក Masoud Pezeshkian បានប្ដេជ្ញាថានឹងសាងសង់ឡើងវិញនូវកន្លែងផលិតនុយក្លេអ៊ែរដែលត្រូវបានបំផ្លាញ «ជាមួយនឹងថាមពលកាន់តែខ្លាំង» បន្ទាប់ពីអគាររបស់ខ្លួនរងការវាយប្រហារក្នុងប្រតិបត្តិការ Rising Lion របស់អ៊ីស្រាអែលកាលពីខែមិថុនា។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Reuters នៅថ្ងៃទី០៣ខែវិច្ឆិកា។

ប្រធានាធិបតី Pezeshkian បាននិយាយថា ការខូចខាតនេះនឹងមិនបញ្ឈប់វឌ្ឍនភាពរបស់ប្រទេសអ៊ីរ៉ង់នោះទេ។ ក្នុងអំឡុងពេលទស្សនកិច្ចរបស់លោកទៅកាន់អង្គការថាមពលអាតូមិក លោកបានទទួចថា កម្មវិធីនុយក្លេអ៊ែររបស់អ៊ីរ៉ង់គឺសម្រាប់តែការប្រើប្រាស់ដោយសន្តិវិធីប៉ុណ្ណោះ ដូចជាក្នុងវិស័យវេជ្ជសាស្ត្រ និងវិទ្យាសាស្ត្រ។ លោក​បាន​មានប្រសាសន៍​ថា៖«ការ​បំផ្លាញ​អគារ​របស់អ៊ីរ៉ង់នឹង​មិន​បញ្ឈប់​អ៊ីរ៉ង់ទេ យើង​នឹង​សាងសង់​ឡើង​វិញ​ឲ្យ​រឹងមាំ​ជាង​មុន»។

គួរបញ្ជាក់ថាបន្ទាប់ពីការវាយប្រហារកាលពីខែមិថុនា សហរដ្ឋអាមេរិក និងអ៊ីស្រាអែលបានអះអាងថា សមត្ថភាពចម្រាញ់នុយក្លេអ៊ែររបស់អ៊ីរ៉ង់ត្រូវបានរារាំង។ ប្រធានាធិបតីអាមេរិកលោក ដូណាល់ ត្រាំ បានព្រមានថា ទីក្រុងវ៉ាស៊ីនតោននឹងបញ្ជាឱ្យមានការវាយប្រហារថ្មី ប្រសិនបើអ៊ីរ៉ង់ព្យាយាមកសាងកន្លែងផលិតនុយក្លេអ៊ែររបស់ខ្លួនឡើងវិញ។ ទោះជាយ៉ាងណាក៏ដោយ មេដឹកនាំកំពូលរបស់អ៊ីរ៉ង់លោក Ayatollah Ali Khamenei បានច្រានចោលការអះអាងទាំងនោះដោយនិយាយថា សហរដ្ឋអាមេរិក «គួរតែបន្តសុបិនទៀតចុះ» ប្រសិនបើខ្លួនជឿថាកម្មវិធីនុយក្លេអ៊ែររបស់អ៊ីរ៉ង់ត្រូវបានបំផ្លាញ។

លើសពីនេះអ៊ីរ៉ង់បានបញ្ចប់កិច្ចព្រមព្រៀងសហប្រតិបត្តិការរបស់ខ្លួនជាមួយអង្គការឃ្លាំមើលនុយក្លេអ៊ែររបស់អង្គការសហប្រជាជាតិ គឺ IAEA បន្ទាប់ពីសហរដ្ឋអាមេរិកបានប្រកាសថាខ្លួននឹងចាប់ផ្តើមសាកល្បងអាវុធនុយក្លេអ៊ែរឡើងវិញ ដោយមន្ត្រីអ៊ីរ៉ង់បានរិះគន់យ៉ាងខ្លាំងចំពោះការសម្រេចចិត្តរបស់សហរដ្ឋអាមេរិក៕

អត្ថបទ៖ ប៊ុន សុភាព