ក្រុមហ៊ុន Fujifilm សាកល្បងថ្នាំគ្រាប់ព្យាបាលជំងឺកូវីដ-១៩ ដំណាក់កាលចុងក្រោយ

ក្រុមហ៊ុន Fujifilm Holdings Corp អះអាងថា ខ្លួនបានចាប់ផ្តើមការសាកល្បងថ្នាំគ្រាប់ព្យាបាលជំងឺកូវីដ-១៩ ដំណាក់កាលចុងក្រោយនៅក្នុងប្រទេសជប៉ុន ដែលនេះជាក្តីសង្ឃឹមម្រាប់អ្នកជំងឺសម្រាកព្យាបាលនៅតាមផ្ទះ។

ក្រុមហ៊ុន Fujifilm ជាស្ថាប័នអាជីវកម្មផ្នែកតាមម៉ាស៊ីនថតរូប និងផ្នែកវេជ្ជសាស្ត្រអស់ពេលជាច្រើនឆ្នាំមកហើយ ពេលនេះនិយាយថា ខ្លួនកំពុងស្រាវជ្រាវថ្នាំគ្រាប់ដែលផ្តោតទៅលើអ្នកជំងឺកូវីដ-១៩ដែលមានអាយុលើសពី ៥០ ឆ្នាំ និងអ្នកដែលមានហានិភ័យនៃការវិវត្តទៅជារោគសញ្ញាធ្ងន់ធ្ងរ។

ថ្នាំ Avigan ឬ Favipiravir ត្រូវបានក្រុមហ៊ុន Fujifilm កំពុងធ្វើតេស្ត និង​ត្រូវបានគេសិក្សានៅក្នុងការសាកល្បងរាប់សិបកន្លែងនៅទូទាំងពិភពលោក ហើយវាត្រូវបានអនុញ្ញាតឱ្យប្រើសម្រាប់ព្យាបាលជំងឺកូវីដ-១៩ នៅក្នុងប្រទេសរុស្ស៊ី ឥណ្ឌា និងឥណ្ឌូណេស៊ី។ ប៉ុន្តែការព្រួយបារម្ភនៅតែមានចំពោះថ្នាំនេះ ព្រោះនៅក្នុងការសិក្សាទៅលើសត្វបង្ហាញថា វាអាចបណ្តាលឱ្យមានពិការភាពពីកំណើត។

ទោះយ៉ាងណា ប្រទេសជប៉ុននៅតែយល់ព្រមឱ្យប្រើថ្នាំ Avigan ជាឱសថសម្រាប់ព្យាបាលជំងឺផ្តាសាយបន្ទាន់ ហើយកាលពីចុងឆ្នាំមុន រដ្ឋាភិបាលបានអំពាវនាវឲ្យក្រុមហ៊ុន Fujifilm ជាអ្នកទទួលស្តុកថ្នាំទុកសម្រាប់នៅផ្គត់ផ្គង់ក្នុងស្រុក៕

ប្រែសម្រួល៖ សន្យា

ប្រភព៖ the japan times

ចុចអាន៖ ក្តៅៗ ជប៉ុន អនុញ្ញាតឲ្យប្រើប្រាស់ថ្នាំ Baricitinib ព្យាបាលអ្នកជំងឺកូវីដ-១៩

ចុចអាន៖ ការស្រាវជ្រាវ ៖ អ្នក ជំងឺកូវីដ ១៩ ករណីស្រាលដែលមិនបានទៅសម្រាកព្យាបាលនៅមន្ទីរពេទ្យមានហានិភ័យស្លាប់ក្នុងរយៈពេល ៦ ខែ