Connect with us

ព័ត៌មានអន្ដរជាតិ

ផ្ទុះឆេះសន្ធោសន្ធៅរោងចក្រគីមីនៅ ថៃ ស្លាប់ និងរងរបួស ៣០ នាក់

បានផុស

នៅ

ការផ្ទុះដ៏ខ្លាំងមួយ បានកើតឡើងនៅក្នុងរោងចក្រផលិតស្នោមួយកន្លែង នៅក្នុងស្រុក Bang Phli ខេត្ត Samut Prakan ប្រទេសថៃនៅព្រឹកថ្ងៃចន្ទនេះ ដែលបណ្តាលឲ្យមនុស្សម្នាក់ស្លាប់ និងយ៉ាងហោចណាស់ ២៩ នាក់រងរបួស ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការផ្ទុះនេះ បានកើតឡើងនៅរោងចក្រគីមី Ming Dih Chemical Co ដែលមានឃ្លាំងប្រហែល ៥ ទៅ ៦ កន្លែង និងផ្ទុកសារធាតុគីមី ៥០ តោន ។

ទន្ទឹមនោះ រថយន្តពន្លត់អគ្គីភ័យជាង ៣០ គ្រឿងមកពីអង្គភាពរដ្ឋបាលមូលដ្ឋាន Rachathewa និងរដ្ឋបាលមូលដ្ឋានផ្សេងទៀត ត្រូវបានបញ្ជូនទៅកន្លែងកើតហេតុភ្លាមៗផងដែរ ។

បន្ថែមពីនេះ ឧទ្ធម្ភាគចក្រក៏ត្រូវបានបញ្ជូនទៅទម្លាក់ទឹកទៅលើអគ្គីភ័យនោះផងដែរ ខណៈដែលផ្សែងក្រាស់ៗនៅតែបន្តហុយពីរោងចក្រដែលកំពុងឆេះ ។ ផ្សែងក្រាស់ៗនោះ ត្រូវបានគេមើលឃើញយ៉ាងច្បាស់នៅទីក្រុងបាងកក ហើយក៏អាចមើលឃើញពីអាកាសយានដ្ឋានសុវណ្ណភូមិផងដែរ ប៉ុន្តែការហោះហើរមិនត្រូវបានប៉ះពាល់ឡើយ ។

ចំណែកសារព័ត៌មាន Bangkok Post បានរាយការណ៍ថា ការផ្ទុះនេះនាំឲ្យមានអគ្គិភ័យដ៏ធំមួយ ដែលបណ្តាលឲ្យខូចខាតទាំងអគាររោងចក្រ និងផ្ទះនៅក្បែរនោះ ដែលមានចម្ងាយមួយគីឡូម៉ែត្រ និងយ៉ាងហោចណាស់មនុស្ស ២៩ នាក់បានរងរបួស និងស្លាប់ម្នាក់ ។

ស្របពេលជាមួយគ្នានេះ អាជ្ញាធរមូលដ្ឋានក្នុងខេត្ត Samut Prakan ក៏បានបញ្ជាឲ្យជម្លៀសប្រជាជនចេញ ក្នុងចម្ងាយ ៥ គីឡូម៉ែត្រ ពីរោងចក្រដែលឆាបឆេះនោះ ខណៈមូលហេតុនៃការផ្ទុះនេះមិនទាន់ត្រូវបានគេដឹងនៅឡើយទេ ។

គួរបញ្ជាក់ថា ក្រុមហ៊ុន Ming Dih Chemical Co ដែលមានមូលដ្ឋាននៅកោះតៃវ៉ាន់ បានបង្កើតរោងចក្រនេះឡើងនៅឆ្នាំ ១៩៩៨ ។ រោងចក្រនេះ គឺជាមជ្ឈមណ្ឌលចែកចាយផលិតផលទៅទីផ្សារក្នុងស្រុក និងនាំចេញទៅប្រទេសជិតខាងផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ វីរុស​បំប្លែង​ខ្លួន​ដ៏​កាច​សាហាវ​ Delta​ វាយ​ប្រហារ​ក្រុងបាងកក ៧០ ភាគរយ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម