ព័ត៌មានអន្ដរជាតិ

មេដឹកនាំអាមេរិកចុះហត្ថលេខាបញ្ចប់បេសកកម្ម១៨ឆ្នាំនៅអ៉ីរ៉ាក់

បានផុស

២ ខែ មុន

នៅ

ថ្ងៃអង្គារ ២៧ កក្កដា ២០២១

ដោយ

លោកប្រធានាធិបតីសហរដ្ឋអាមេរិក ចូ បៃដិន និងលោកនាយករដ្ឋមន្ត្រីអ៉ីរ៉ាក់ Mustafa al-Kadhimi នៅថ្ងៃចន្ទ ទី២៦ ខែកក្កដា បានចុះហត្ថលេខាលើកិច្ចព្រមព្រៀងជាផ្លូវការមួយដើម្បីបញ្ចប់បេសកកម្មប្រយុទ្ធរបស់អាមេរិកនៅអ៉ីរ៉ាក់ត្រឹមបំណាច់ឆ្នាំ២០២១នេះ បន្ទាប់ពីកម្លាំងអាមេរិកចូលលុកលុយប្រទេសនេះរយៈពេល១៨ឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួបផ្សំនឹងការដកកម្លាំងទ័ពអាមេរិករបស់លោក បៃដិន ចេញពីប្រទេសអាហ្វហ្គានីស្ថានត្រឹមចុងខែសីហាខាងមុខនេះ លោកប្រធានាធិបតីប្រជាធិបតេយ្យកំពុងបញ្ចប់បេសកម្មសង្គ្រាមអាមេរិកក្នុងប្រទេសទាំងពីរដែលពេលនោះស្ថិតក្រោមប្រធានាធិបតី George W Bush ដែលលោក បៃដិន ជាអ្នកឃ្លាំមើល។

លោក ចូ បៃដិន និងលោក Kadhimi បានជួបគ្នានៅការិយាល័យប្រធានាធិបតីអាមេរិកក្នុងសេតវិមានដែលជាការជួបគ្នាផ្ទាល់លើកដំបូងក្នុងផ្នែកនៃកិច្ចពិភាក្សាយុទ្ធសាស្ត្ររវាងសហរដ្ឋអាមេរិក និងអ៉ីរ៉ាក់។

លោក បៃដិន បានប្រាប់អ្នកកាសែតក្រោយពេលជួបលោក Kadhimi ថា ៖«តួនាទីរបស់យើងនៅប្រទេសអ៉ីរ៉ាកនឹងនៅតែបន្តមានគឺបន្តបណ្តុះបណ្តាល ឧបត្ថម្ភគាំទ្រ និងដោះស្រាយជាមួយ ISIS ប៉ុន្តែយើងនឹងមិនបន្តទេសម្រាប់បេសកកម្មប្រយុទ្ធគឺត្រូវបញ្ចប់ត្រឹមបំណាច់ឆ្នាំនេះ»។

សព្វថ្ងៃ កងកម្លាំងទ័ពអាមេរិកចំនួន២៥០០នាក់ស្ថិតនៅប្រទេសអ៉ីរ៉ាក់ដោយផ្តោតលើការប្រឆាំងនឹងរដ្ឋឥស្លាមនិយមដែលសេសសល់។ តួនាទីរបស់អាមេរិកនឹងផ្លាស់ប្តូរទាំងស្រុងទៅជាជំនួយផ្នែកការបណ្តុះបណ្តាល និងប្រឹក្សាដល់ទាហានអ៉ីរ៉ាក់ពីរបៀបការពារខ្លួន។

ការផ្លាស់ប្តូរនេះត្រូវបានគេរំពឹងថា នឹងមិនមានផលប៉ះពាល់ធំដុំទេ ដោយសារអាមេរិកបានផ្លាស់ប្តូររួចទៅហើយដោយផ្តោតលើការបណ្តុះបណ្តាលដល់កម្លាំងទ័ពអ៉ីរ៉ាក់។

កម្លាំងចម្រុះដឹកនាំដោយអាមេរិកបានចូលលុកលុយអ៉ីរ៉ាក់ក្នុងខែមីនា ឆ្នាំ២០០៣ដោយផ្អែកលើការចោទប្រកាន់ចំពោះរដ្ឋាភិបាលរបស់មេដឹកនាំអ៉ីរ៉ាក់ Saddam Hussein ថា មានអាវុធប្រល័យលោក។ បន្ទាប់មក លោក Saddam ត្រូវបានបណ្តេញចេញពីអំណាច ប៉ុន្តែអាវុធដែលចោទប្រកាន់នោះរកមិនឃើញ៕

ប្រែសម្រួល៖ វីរបុត្រ
ប្រភព៖ Reuters