ខេត្ត ២ ទៀតរបស់ ចិន ផ្ទុះឆ្លងកូវីដក្នុងសហគមន៍

អាជ្ញាធរសុខាភិបាលចិនបាននិយាយនៅថ្ងៃសៅរ៍នេះថា ការផ្ទុះឡើងនៃជំងឺកូវីដ ១៩ ដ៏អាក្រក់បំផុតរបស់ប្រទេសចិនក្នុងរយៈពេលប៉ុន្មានខែនេះ បានរាលដាលដល់តំបន់ ២ ផ្សេងទៀតនៃប្រទេស រួមទាំងទីក្រុងដែលមានប្រជាជនចំនួន ៣១ លាននាក់ផងដែរ ។

គណៈកម្មការសុខភាពជាតិបានរាយការណ៍ថា មានករណីឆ្លងថ្មីចំនួន ៥៥ ករណីនៅក្នុងតំបន់ រួមទាំងខេត្ត Fujian និងទីក្រុង Chongqing ដោយបន្ថែមលើខេត្តចំនួន ៤ និងទីក្រុងប៉េកាំង ដែលមានការផ្ទុះឡើងនៃវីរុសបំប្លែងខ្លួនឥណ្ឌា “Delta” រួចហើយនោះ ។

ការឆ្លងជាង ២០០ ករណីនៅទូទាំងប្រទេស ត្រូវបានផ្សារភ្ជាប់ទៅនឹងការឆ្លងជាចង្កោមនៅខេត្ត Jiangsu ភាគខាងកើត ក្នុងនោះរួមមានអ្នកបោសសំអាត ៩ នាក់នៅអាកាសយានដ្ឋានអន្តរជាតិក្នុងទីក្រុង Nanjing បានធ្វើតេស្តវិជ្ជមាននៅថ្ងៃទី ២០ ខែកក្កដា ។

ទន្ទឹមនោះ មនុស្សរាប់សែននាក់ត្រូវបានបិទខ្ទប់រួចហើយនៅក្នុងខេត្ត Jiangsu ខណៈទីក្រុង Nanjing បានធ្វើតេស្តលើប្រជាជនទាំង ៩.២ លាននាក់ចំនួន ២ ដង ។

ចំណែក ទីក្រុងទេសចរណ៍ Zhangjiajie នៅខេត្ត Hunan ដែលមានករណីឆ្លងមួយចំនួន ក៏បានបិទខ្ទប់ប្រជាជនចំនួន ១.៥ លាននាក់ និងបិទកន្លែងទាក់ទាញទេសចរណ៍ទាំងអស់កាលពីថ្ងៃសុក្រ ។

រីឯនៅតំបន់ Changping របស់ទីក្រុងប៉េកាំង ជាកន្លែងដែលមានករណីឆ្លងក្នុងសហគមន៍ចំនួន ២ ករណីក៏ត្រូវបានដាក់ការបិទខ្ទប់លើមនុស្សចំនួន ៤១,០០០ នាក់កាលពីថ្ងៃព្រហស្បតិ៍ ។

គួររំឭកថា ប្រទេសចិនបានដាក់ការបិទខ្ទប់ដំបូងបង្អស់របស់ពិភពលោកនៅដើមឆ្នាំ ២០២០ ដោយសារកូវីដ ១៩ បានផ្ទុះចេញពីទីក្រុងអ៊ូហានភាគកណ្តាលប្រទេស ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ចិន ជួបវិបត្តិកូវីដធ្ងន់ធ្ងរបំផុតមិនធ្លាប់មាន ចាប់តាំងពីការផ្ទុះឡើងនៅ Wuhan