ចិន ជួបវិបត្តិកូវីដធ្ងន់ធ្ងរបំផុតមិនធ្លាប់មាន ចាប់តាំងពីការផ្ទុះឡើងនៅ Wuhan

ការផ្ទុះឡើងនៃជំងឺកូវីដ-១៩ ដែលត្រូវបានគេរកឃើញដំបូងនៅទីក្រុង Nanjing ប្រទេសចិន បានរាលដាលដល់ខេត្តចំនួន៥និងរដ្ឋធានីប៉េកាំងផងដែរ ខណៈប្រព័ន្ធផ្សព្វផ្សាយរដ្ឋបានហៅវាថា ជាការឆ្លងរាលដាលធំធេងបំផុតបន្ទាប់ពីវិបត្តិនៅ Wuhan។

មនុស្សជិត ២០០ នាក់បានឆ្លងមេរោគនេះ ចាប់តាំងពីវីរុស ត្រូវបានគេរកឃើញដំបូងនៅអាកាសយានដ្ឋានដ៏មមាញឹករបស់ទីក្រុង កាលពីថ្ងៃទី ២០ ខែកក្កដា។

ជើងហោះហើរទាំងអស់មកពីអាកាសយានដ្ឋានក្រុង Nanjing នឹងត្រូវផ្អាករហូតដល់ថ្ងៃទី ១១ ខែសីហា។ ក្រុមមន្រ្តី ក៏បានចាប់ផ្តើមការធ្វើតេស្តទូទាំងទីក្រុងផងដែរ ចំពេលមានការរិះគន់ចំពោះភាពអសកម្ម របស់ពួកគេ។

សារព័ត៌មាន Xinhua បានរាយការណ៍ថា ប្រជាជន ៩.៣ លាននាក់នៅក្នុងទីក្រុងនេះ រួមទាំងភ្ញៀវទេសចរផងដែរ នឹងត្រូវធ្វើតេស្ត។

ក្រុមមន្រ្តីជឿជាក់ថា ការផ្ទុះឡើងថ្មីៗនេះ គឺត្រូវបានផ្សារភ្ជាប់ទៅនឹងវីរុសបំប្លែងខ្លួនឆ្លងខ្លាំង Delta ហើយបានរីករាលដាលកាន់តែខ្លាំងដោយសារតែ វាត្រូវបានគេរកឃើញនៅអាកាសយានដ្ឋានដ៏មមាញឹក។

អ្នកគ្រប់គ្រងព្រលានយន្តហោះ បានរងការស្តីបន្ទោស ស្របពេលស្ថាប័នវិន័យជាន់ខ្ពស់នៃបក្សកុម្មុយនិស្តបាននិយាយថា វាមានបញ្ហាជាច្រើន ដូចជាកង្វះការត្រួតពិនិត្យនិងការគ្រប់គ្រងដែលមិនមានជំនាញវិជ្ជាជីវៈជាដើម។

ការធ្វើតេស្តបានបង្ហាញថា ឥឡូវនេះ វីរុសបានរាលដាលដល់ទីក្រុងយ៉ាងតិច១៣ហើយ។

ទោះបីជាយ៉ាងណាក៏ដោយ អ្នកជំនាញបាននិយាយថា ពួកគេជឿជាក់ថាការផ្ទុះឡើងនេះ គឺនៅតែស្ថិតក្នុងដំណាក់កាលដំបូង ហើយអាចគ្រប់គ្រងបាន៕

ប្រែសម្រួល៖ Vann Vann

ប្រភព៖ BBC

ចុចអាន៖ ចិន ប្រកាសរកឃើញអ្នកឆ្លងកូវីដ ច្រើនបំផុតមិនធ្លាប់មាន ចាប់តាំងពីចុងខែមករា