ព័ត៌មានអន្ដរជាតិ

ថៃសាកល្បងវ៉ាក់សាំងកូវីដថ្មី Chula លើកទី១មានប្រសិទ្ធភាពខ្ពស់ប្រឆាំងវីរុសទាំង៤នេះ

បានផុស

៥ years មុន

នៅ

ថ្ងៃអង្គារ ១៧ សីហា ២០២១

ដោយ

ក្រុមស្រាវជ្រាវស្ថិតនៅពីក្រោយការអភិវឌ្ឍវ៉ាក់សាំងបង្ការកូវីដ-១៩ mRNA កាលពីថ្ងៃចន្ទបានស្នើដល់រដ្ឋាភិបាលឲ្យជួយផ្នែកហិរញ្ញវត្ថុសម្រាប់គម្រោង និងបន្ធូរបន្ថយផ្នែកច្បាប់ដើម្បីឲ្យដំណើការផលិតវ៉ាក់សាំងអាចទទួលបានមុនខែមេសា។

លោកវេជ្ជបណ្ឌិត Kiat Ruxrungtham អ្នកដឹកនាំក្រុមស្រាវជ្រាវដើម្បីផលិតវ៉ាក់សាំង Chula-VAC001 នៅមហាវិទ្យាល័យឱសថសាស្ត្ររបស់សាកលវិទ្យាល័យ Chulalongkorn កាលពីថ្ងៃចន្ទម្សិលមិញបានប្រកាសពីការសាកល្បងវ៉ាក់សាំងរបស់ខ្លួនលើមនុស្សលើកដំបូងទទួលបានជោគជ័យ។

លោកបានឲ្យដឹងថា អ្នកស្ម័គ្រចិត្ត៣៦នាក់ក្នុងចំណោម៧២នាក់ដែលមានអាយុពី១៨ឆ្នាំដល់៧៥នាក់បានចាក់វ៉ាក់សាំង Chula-VAC001 និងបានបង្ហាញថា គ្មានផលប៉ះពាល់អ្វីឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត Kiat បានលើកឡើងថា ៖«ការសាកល្បងបានរកឃើញថា វ៉ាក់សាំង Chula-VAC001 មានអត្រាប្រសិទ្ធភាពខ្ពស់ក្នុងការការពារពីការឆ្លងកូវីដ-១៩រហូតដល់៩៤%។ កម្រិតប្រសិទ្ធភាពស្មើនឹងវ៉ាក់សាំង Pfizer»។

«លទ្ធផលបឋមដែលទទួលបានត្រឹមមួយសប្តាហ៍ បន្ទាប់ពីចាក់ដូសទី២បង្ហាញថា វាមានអត្រាប្រសិទ្ធភាពដល់ទៅ៨០%ដើម្បីបង្កើតភាពស៊ាំសម្រាប់ការពារជំងឺកូវីដ-១៩រាប់ទាំងវីរុសបំប្លែងខ្លួន Alpha, Beta, Gamma និង Delta»។ លោកវេជ្ជបណ្ឌិតបានរៀបរាប់។

លោកបានបន្តថា ៖«បន្ទាប់ពីទទួលបានជោគជ័យដ៏ល្អនៃការសាកល្បងចាក់លើមនុស្សដំណាក់កាលទី១ យើងរំពឹងចាប់ផ្តើមសាកល្បងដំណាក់កាលទី២លើអ្នកស្ម័គ្រចិត្ត១៥០នាក់នៅសប្តាហ៍ក្រោយ។ លើកនេះ ពាក់កណ្តាលនៃអ្នកស្ម័គ្រចិត្តនឹងចាក់វ៉ាក់សាំង Pfizer ដូច្នេះយើងអាចធ្វើការប្រៀបធៀបរវាងវ៉ាក់សាំង mRNA ទាំងពីរប្រភេទនេះបាន»។

លោកបន្ថែមថា ៖«សម្រាប់ការសាកល្បងដំណាក់កាលទី២ (ខ) នឹងចាប់ផ្តើមនៅខែតុលាដែលមានអ្នកស្ម័គ្រចិត្ត៥០០០នាក់ដោយការចាក់វ៉ាក់សាំងលាយបញ្ចុះគ្នាពីក្រៅប្រទេស និង BioNet Asia។ វាជាឱកាសល្អណាស់ដើម្បីធ្វើតេស្តប្រសិទ្ធភាពនៃវ៉ាក់សាំងផលិតដោយជនជាតិថៃ»។

ទោះបីជាយ៉ាងណា លោកបាននិយាយថា ថ្មីៗនេះ ក្រុមស្រាវជ្រាវត្រូវការជំនួយពីរដ្ឋាភិបាល ជាពិសេសជំនួយផ្នែកហិរញ្ញវត្ថុដើម្បីឲ្យគម្រោងដំណើរការដោយរលូន។ ជាមួយគ្នានេះក្រុមស្រាវជ្រាវក៏ត្រូវការជំនួយផ្នែកច្បាប់ពីរដ្ឋាភិបាលដែរ ពីព្រោះទីភ្នាក់ងារដែលមានម្ចាស់ជារដ្ឋមិនត្រូវបានអនុញ្ញាតឲ្យទិញវ៉ាក់សាំងដែលមិនទាន់សាកល្បងគ្គីនិកសាស្ត្រចប់សព្វគ្រប់ទេ។

លោកវេជ្ជបណ្ឌិត Kiat បានកត់សំគាល់ថា រដ្ឋបាលចំណីអាហារ និងឱសថ (FDA) គួរបន្ធូរបន្ថយច្បាប់របស់ខ្លួនលើការប្រើប្រាស់វ៉ាក់សាំងដែលផលិតដោយថៃសម្រាប់ការប្រើប្រាស់បន្ទាន់។

លោកថា ៖«យើងនឹងទទួលបានទិសដៅច្បាស់លាស់ពី FDA នៅខែក្រោយ។ ប្រសិនបើយើងអាចឈានដល់ការសាកល្បងដំណាក់កាលទី២ (ខ) នោះថៃអាចទទួលបានវ៉ាក់សាំងនេះមុនបុណ្យចូលឆ្នាំថ្មីនាខែមេសា។ បើអត់ទេ ផែនការនឹងពន្យាពេលទៀត»។

លោកបញ្ជាក់ថា វ៉ាក់សាំង Chula-VAC001 ក៏អាចប្រើសម្រាប់ចាក់ដូសជំរុញបន្ថែមឬហៅដូសទី៣សម្រាប់ប្រជាជនថៃដែរ ប៉ុន្តែក្រុមស្រាវជ្រាវត្រូវការមើលផែនការគ្រប់គ្រងឲ្យច្បាស់លាស់សម្រាប់ឆ្នាំក្រោយ៕

ប្រែសម្រួល៖ វីរបុត្រ
ប្រភព៖ bangkokpost