WHO គាំទ្រឲ្យយកថ្នាំលាយ ទៅព្យាបាលកូវីដ

អង្គការសុខភាពពិភពលោក (WHO) នៅថ្ងៃសុក្រនេះ បានណែនាំឲ្យប្រើថ្នាំលាយរបស់ក្រុមហ៊ុន Regeneron (REGN.O) និង Roche (ROG.S) សម្រាប់អ្នកជំងឺដែលមានហានិភ័យខ្ពស់នៃការចូលមន្ទីរពេទ្យ និងអ្នកជំងឺធ្ងន់ធ្ងរដែលគ្មានអង់ទីគ័រពីធម្មជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្យាបាលបែបនេះ ត្រូវបានផ្តល់ការអនុញ្ញាតឲ្យប្រើជាបន្ទាន់នៅសហរដ្ឋអាមេរិក ហើយទទួលបានការចាប់អារម្មណ៍យ៉ាងខ្លាំងនៅពេលគេប្រើ ដើម្បីព្យាបាលជំងឺកូវីដ-១៩ របស់អតីតប្រធានាធិបតី ដូណាល់ ត្រាំ កាលពីឆ្នាំមុន។

អឺរ៉ុបក៏កំពុងពិនិត្យមើលការព្យាបាលនេះផងដែរ ខណៈអង់គ្លេសបានអនុម័តកាលពីខែមុន។

ស្របពេលមានការទទួលស្គាល់លើថ្លៃចំណាយទាក់ទងនឹងការព្យាបាលនេះ ក្រុមប្រឹក្សារបស់ WHO បាននិយាយថា “អនុសាសន៍នេះនឹងផ្តល់ជាការជំរុញឲ្យចូលរួមគ្រប់យន្តការដែលអាចធ្វើទៅបាន ដើម្បីធ្វើឲ្យប្រសើរឡើងនូវការចូលរួមជាសកល និងការធ្វើតេស្តដែលពាក់ព័ន្ធ”។

នៅក្នុងសេចក្តីថ្លែងការណ៍ដាច់ដោយឡែកមួយ WHO បានអំពាវនាវឲ្យក្រុមហ៊ុន Regeneron បញ្ចុះតម្លៃនិងចែកចាយការព្យាបាលនេះដោយស្មើភាព នៅទូទាំងពិភពលោក ជាពិសេសនៅក្នុងប្រទេសដែលមានចំណូលទាបនិងមធ្យម។ ទីភ្នាក់ងារនេះ ក៏បានជំរុញឲ្យក្រុមហ៊ុននានា ផ្ទេរបច្ចេកវិទ្យាដើម្បីជួយបង្កើតជីវវិទ្យាស្រដៀងគ្នាផងដែរ។

ការព្យាបាលដែលមានឈ្មោះថា Ronapreve ឬ REGEN-COV នៅសហរដ្ឋអាមេរិក បានក្លាយជាវិធីរកប្រាក់ចំណូលបានយ៉ាងច្រើនសន្ធឹកសន្ធាប់សម្រាប់ក្រុមហ៊ុន Regeneron ដោយលក់បានប្រាក់ចំនួន ២.៥៩ ពាន់លានដុល្លារអាមេរិកនៅត្រីមាសទី២។

ក្រុមហ៊ុន Regeneron នឹងផ្គត់ផ្គង់ថ្នាំ REGEN-COV ចំនួន ១.៤ លានដូសបន្ថែម ដល់រដ្ឋាភិបាលសហរដ្ឋអាមេរិកនៅថ្ងៃទី ៣១ ខែមករា ក្នុងតម្លៃ ២,១០០ ដុល្លារក្នុងមួយដូស៕

ប្រែសម្រួល៖ Vann Vann

ប្រភព៖ Reuters

ចុចអាន៖ WHO លើកចំណុចសំខាន់២ ដែលអាចបញ្ចប់ការរីករាលដាល នៃជំងឺរាតត្បាត