អាមេរិក អនុញ្ញាតផ្ដល់ជំនួយដល់ប្រជាជន អាហ្វហ្គានីស្ថាន ក្រោយ តាលីបង់ ឲ្យហូបតែមួយពេលប៉ុណ្ណោះក្នុងមួយថ្ងៃ

រតនាគារអាមេរិកបាននិយាយកាលពីថ្ងៃសុក្រថា ខ្លួនបានចេញអាជ្ញាប័ណ្ណអនុញ្ញាតឲ្យរដ្ឋាភិបាលសហរដ្ឋអាមេរិក អង្គការក្រៅរដ្ឋាភិបាល និងអង្គការអន្តរជាតិ ដូចជាអង្គការសហប្រជាជាតិ (UN) ធ្វើប្រតិបត្តិការជាមួយក្រុមតាលីបង់ ឬបណ្តាញ Haqqani ដើម្បីផ្តល់ជំនួយមនុស្សធម៌ ទោះបីជាសហរដ្ឋអាមេរិកដាក់ទណ្ឌកម្មលើក្រុមសកម្មប្រយុទ្ធទាំងពីរនេះក៏ដោយ ។

ទន្ទឹមនោះ មានការព្រួយបារម្ភកាន់តែខ្លាំងឡើងថា វិធានការដាក់ទណ្ឌកម្មរបស់អាមេរិក អាចធ្វើឲ្យវិបត្តិនៅអាហ្វហ្គានីស្ថានកាន់តែធ្ងន់ធ្ងរឡើង ។

ក្រសួងបាននិយាយនៅក្នុងសេចក្តីប្រកាសមួយថា “រតនាគារនៅតែប្តេជ្ញាធានាថា ទណ្ឌកម្មអាមេរិកមិនកំណត់សមត្ថភាពជនស៊ីវិលនៅអាហ្វហ្គានីស្ថាន ដើម្បីទទួលបានការគាំទ្រផ្នែកមនុស្សធម៌ពីរដ្ឋាភិបាលសហរដ្ឋអាមេរិក និងសហគមន៍អន្តរជាតិឡើយ” ។

បើតាមការបញ្ជាក់របស់លោក Andrea M. Gacki នាយកគ្រប់គ្រងទ្រព្យសម្បត្តិបរទេសបានបន្ថែមនៅក្នុងសេចក្តីថ្លែងការណ៍នោះថា “ការប្រកាសនេះនឹងជួយបន្ធូរបន្ថយលំហូរនៃធនធានសំខាន់ៗដូចជា ទំនិញកសិកម្ម ថ្នាំពេទ្យ និងសម្ភារៈចាំបាច់ដទៃទៀតដល់ប្រជាជនដែលកំពុងត្រូវការ ស្របតាមការគាំទ្រ និងការអនុវត្តការដាក់ទណ្ឌកម្មរបស់យើង” ។

ស្របពេលជាមួយគ្នានេះ យោងតាមអង្គការសហប្រជាជាតិ (UN) បានឲ្យដឹងថា ការកាន់កាប់របស់តាលីបង់បានធ្វើឲ្យកុមារជាង ១ លាននាក់ស្ថិតក្នុងគ្រោះថ្នាក់នៃភាពអត់ឃ្លានខ្លាំង ហើយ ១៤ លាននាក់កំពុងប្រឈមមុខនឹ ភាពអត់ឃ្លានធ្ងន់ធ្ងរ ។

បន្ថែមពីនេះ អង្គការសុខភាពពិភពលោក (WHO) បានព្រមានថា ប្រព័ន្ធថែទាំសុខភាពរបស់អាហ្វហ្គានីស្ថានកំពុងស្ថិតក្នុងវិបត្តិនៃការដួលរលំ ។

ចំណែកការស្ទង់មតិនាពេលថ្មីៗនេះបានរកឃើញថា មានតែគ្រួសារ ៥ ភាគរយប៉ុណ្ណោះដែលមានអាហារគ្រប់គ្រាន់ជារៀងរាល់ថ្ងៃ ខណៈដែលពាក់កណ្តាលទៀតបានរាយការណ៍ថា មានការហូបចុកពេញលេងយ៉ាងហោចណាស់មួយពេលប៉ុណ្ណោះ ក្នុងរយៈពេល ២ សប្តាហ៍ចុងក្រោយនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Yahoo

ចុចអាន ៖ អាមេរិក អាចនឹងផ្ទុះកូវីដខ្លាំងនៅសាលារៀន ដោយសារតែគ្រូនិងសិស្សមិនចូលរួមពាក់ម៉ាសគ្រប់គ្នា