ចិន កំពុងរងគ្រោះធ្ងន់ធ្ងរបំផុតដោយសារកូវីដ ចាប់តាំងពីការផ្ទុះនៅ អ៊ូហាន 

ប្រទេស​ចិន ​កំពុង​រងគ្រោះដោយ​ការ​រីក​រាល​ដាល​ជំងឺ​កូវីដ-១៩ ​ខ្លាំង​បំផុត ​ចាប់​តាំង​ពី​មេរោគ​នេះ​ផ្ទុះឡើង​ដំបូងនៅ​ទីក្រុង អ៊ូហាន ក្នុង​ឆ្នាំ២០១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ករណីកូវីដឆ្លងក្នុងសហគមន៍ថ្មីរបស់ប្រទេសនេះ បានឡើងដល់កម្រិតខ្ពស់បំផុតមិនធ្លាប់មានសោះក្នុងរយៈពេលជិតបីខែ ចំពេលរដ្ឋាភិបាលចិន អះអាងថា ជាការផ្ទុះឡើងនៃវីរុសបំប្លែងខ្លួន Delta ដ៏ធ្ងន់ធ្ងរបំផុត។

គេហទំព័រ Bloomberg បានរាយការណ៍ថា ឥឡូវនេះមានការឆ្លងក្នុងសហគមន៍ជាង ៦០០ ករណីត្រូវបានរកឃើញនៅក្នុងខេត្តចំនួន ១៩ ក្នុងចំណោមខេត្តទាំង ៣១ របស់ប្រទេសចិន។

គណៈកម្មការសុខភាពជាតិបានបញ្ជាក់កាលពីថ្ងៃពុធថា មានការឆ្លងក្នុងសហគមន៍ថ្មីចំនួន ៩៣ករណីសម្រាប់ថ្ងៃអង្គារ ពោលគឺកើនឡើងពី ៥៤ករណីនៅថ្ងៃចន្ទ និងជាករណីប្រចាំថ្ងៃខ្ពស់បំផុតចាប់តាំងពីថ្ងៃទី ៩ខែសីហាមក នៅពេលការផ្ទុះដ៏ធំចុងក្រោយរបស់ប្រទេសចិន ឈានដល់កម្រិតកំពូល។

ករណីក្នុងសហគមន៍ភាគច្រើន ត្រូវបានរកឃើញក្នុងទីក្រុង Heihe នៅភាគខាងជើងនៃខេត្ត Heilongjiang ដែលនៅទីនោះ ការឆ្លងចំនួន៣៥ករណី ត្រូវបានកត់ត្រាកាលពីថ្ងៃអង្គារ។ ខេត្តថ្មីចំនួនបីដែលរកឃើញករណីឆ្លងមានដូចជា Chongqing, Jiangsu និង Henan។

ការរីករាលដាល និងការផ្ទុះខ្លាំងនៃករណីឆ្លងជំងឺកូវីដនេះ បានកើតឡើង បើទោះបីជារដ្ឋាភិបាលចិន អនុវត្តវិធានការកាន់តែតឹងរ៉ឹង ដើម្បីទប់ស្កាត់ករណីឆ្លងក៏ដោយ។

កាលពីថ្ងៃអង្គារ រដ្ឋាភិបាលរបស់ប្រទេសចិន បានជំរុញឲ្យពលរដ្ឋស្តុកទុករបស់ប្រើប្រាស់ប្រចាំថ្ងៃ និងឲ្យអាជ្ញាធរចាត់វិធានការដើម្បីធានាការផ្គត់ផ្គង់ស្បៀងអាហារបានគ្រប់គ្រាន់ ខណៈប្រទេសនេះប្រកាន់យកវិធីសាស្រ្តម៉ឺងម៉ាត់កាន់តែខ្លាំងឡើង ដើម្បីទប់ស្កាត់ការរីករាលដាលចុងក្រោយបង្អស់នេះ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ចិន ប្រកាសឲ្យប្រជាជន ស្តុកទុកស្បៀងអាហារឲ្យហើយ