មេ WHO ថា វ៉ាក់សាំងតែមួយមុខមិនអាចបញ្ចប់ជីវិតកូវីដទេ ត្រូវអនុវត្តវិធីទាំងនេះបន្ថែម

អគ្គនាយកអង្គការសុខភាពពិភពលោក (WHO) លោកវេជ្ជបណ្ឌិត Tedros Adhanom បានរំលឹកឡើងវិញពីតម្រូវការសម្រាប់ប្រទេសទាំងអស់ ក្នុងការបន្តប្រកាន់ខ្ជាប់នូវពិធីសារទប់ស្កាត់ជំងឺកូវីដ ១៩ ទោះបីជាមានយុទ្ធនាការចាក់វ៉ាក់សាំងក៏ដោយ ។

ប្រធាន WHO បាននិយាយនៅក្នុងសន្និសីទខ្លីស្តីពីជំងឺកូវីដ ១៩ កាលពីថ្ងៃព្រហស្បតិ៍ថា វ៉ាក់សាំងមិនអាចកម្ចាត់ជំងឺរាតត្បាតដោយខ្លួនឯងបានទេ ។

លោកបាននិយាយថា “យើងមិនអាចបញ្ចប់កូវីដដោយគ្មានវ៉ាក់សាំងនោះទេ ប៉ុន្តែវ៉ាក់សាំងតែមួយមុខក៏មិនអាចបញ្ចប់ជំងឺរាតត្បាតបានដែរ ។ វ៉ាក់សាំងមិនអាចជំនួសតម្រូវការសម្រាប់វិធានការសុខភាពសាធារណៈ និងសង្គមនោះទេ វ៉ាក់សាំងគ្រាន់តែបានបំពេញបន្ថែមប៉ុណ្ណោះ” ។

លោក Tedros បញ្ជាក់ថា “អ្វីដែលចាំបាច់ក្រៅពីវ៉ាក់សាំងនោះគឺ ការរក្សាគម្លាតសង្គម ការកំណត់ហ្វូងមនុស្ស ពាក់ម៉ាស កន្លែងមានខ្យល់ចេញចូល អនាម័យលាងសម្អាតដៃ និងវិធានការសុខភាពសាធារណៈដ៏មានប្រសិទ្ធភាពផ្សេងទៀត” ។

គួរបញ្ជាក់ថា ការអំពាវនាវរបស់លោកវេជ្ជបណ្ឌិត Tedros កើតឡើង នៅពេលដែលប្រទេសជាច្រើននៅទូទាំងពិភពលោក បានបន្ធូរបន្ថយការរឹតបន្តឹង បន្ទាប់ពីបានឃើញករណីឆ្លងថយចុះនៅក្នុងប្រទេសរបស់ពួកគេ ខណៈរដ្ឋាភិបាលជាច្រើនបានដកការបិទខ្ទប់ បញ្ចប់បម្រាមគោចរ និងបានចាប់ផ្តើមអនុញ្ញាតឲ្យមានការជួបជុំជាសាធារណៈឡើងវិញ ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ មិនមែនតែ អឺរ៉ុប ទេដែលកំពុងផ្ទុះឆ្លងកូវីដជាថ្មី តំបន់អាស៊ីកណ្ដាល ក៏ដូចគ្នា