អាមេរិកជួបព្យុះកំបុតត្បូងដ៏មហន្តរាយ ស្លាប់យ៉ាងតិចក៏ ១០០នាក់ដែរ

មនុស្សយ៉ាងតិច១០០នាក់ ត្រូវបានគេគិតថាស្លាប់នៅក្នុងរដ្ឋ Kentucky បន្ទាប់ពីព្យុះកំបុតត្បូងមួយឆ្លងកាត់តំបន់ភាគខាងលិចនិងខាងត្បូង សហរដ្ឋអាមេរិក ដោយកម្ទេចផ្ទះសម្បែង បំផ្លាញក្រុមហ៊ុន និងជំរុញឲ្យមានប្រតិបត្តិការស្វែងរកអ្នករស់រានមានជីវិតនៅក្រោមគំនរបាក់បែក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខ្យល់ព្យុះដ៏ខ្លាំង បានបំផ្លាញរោងចក្រទៀន ព្រមទាំងស្ថានីយពន្លត់អគ្គិភ័យនិងប៉ុស្តិ៍ប៉ូលិសនៅក្នុងទីក្រុងតូចមួយនៃរដ្ឋ Kentucky ហើយបានវាយលុកមណ្ឌលថែទាំសុខភាពក្នុងរដ្ឋ Missouri នៅជិតនោះ និងសម្លាប់កម្មករចំនួន៦នាក់នៅឃ្លាំងក្រុមហ៊ុន Amazon ក្នុងរដ្ឋ Illinois។

អភិបាលរដ្ឋ Kentucky លោក Andy Beshear បាននិយាយថា ព្យុះកំបុតត្បូងនេះបានបង្កការបំផ្លិចបំផ្លាញបំផុតនៅក្នុងប្រវត្តិសាស្ត្ររបស់រដ្ឋ។ កម្មករប្រហែល៤០នាក់ត្រូវបានជួយសង្គ្រោះនៅរោងចក្រទៀនក្នុងទីក្រុង Mayfield ដែលមានមនុស្សប្រហែល១១០នាក់នៅខាងក្នុង នៅពេលដែលវាត្រូវបានកម្ទេចក្លាយជាគំនរបាក់បែក។

លោក Beshear និយាយថា វានឹងក្លាយជាអព្ភូតហេតុ បើសិនជារកឃើញនរណាម្នាក់ផ្សេងទៀតនៅរស់រានមានជីវិត ក្រោមកម្ទេចកម្ទីមែននោះ។

លោក Beshear និយាយថា បុគ្គលិកឆ្មាំជាតិចំនួន១៨៩នាក់ ត្រូវបានដាក់ពង្រាយដើម្បីជួយដល់ប្រតិបត្តិការសង្គ្រោះ។ កិច្ចខិតខំប្រឹងប្រែងជួយសង្គ្រោះ នឹងផ្តោតជាសំខាន់លើទីក្រុង Mayfield ដែលជាទីក្រុងមានមនុស្សប្រហែល១០,០០០នាក់៕

ប្រែសម្រួល៖ Vann Vann

ប្រភព៖ Reuters

ចុចអាន៖ ព្យុះ Ida សម្លាប់មនុស្ស ៦០នាក់នៅអាមេរិក