មួយភ្លែត កូរ៉េខាងជើង បាញ់មីស៊ីល ៨ គ្រាប់ចូលសមុទ្រខាងកើត

ប្រព័ន្ធផ្សព្វផ្សាយកូរ៉េខាងត្បូងបានរាយការណ៍កាលពីថ្ងៃអាទិត្យថា ប្រទេសកូរ៉េខាងជើងបានបាញ់មីស៊ីលផ្លោងយ៉ាងហោចណាស់ ៨ គ្រាប់ចូលទៅក្នុងសមុទ្រខាងកើត ។

យោធាកូរ៉េខាងត្បូងបាននិយាយថា មីស៊ីលផ្លោងរយៈចម្ងាយខ្លីទាំង ៨ គ្រាប់របស់កូរ៉េខាងជើងគឺបាញ់ចេញពីទីតាំងចំនួន ៤ រួមទាំងពីតំបន់ Sunan ក្បែរទីក្រុងព្យុងយ៉ាង ឆ្ពោះទៅកាន់សមុទ្រខាងកើតក្នុងរយៈពេលជាង ៣០ នាទីប៉ុណ្ណោះ ។

បើយោងតាម​ទីភ្នាក់ងារ​ព័ត៌មាន​រដ្ឋ YNA បានឲ្យដឹងថា នេះ​ជាការ​បង្កហេតុ​លើក​ទី​ ៣ ​ហើយ ចាប់តាំងពីលោក Yoon-Seok-yeol ឡើង​កាន់តំណែងជា​ប្រធានាធិបតី​កូរ៉េខាងត្បូង​ថ្មីកាលពី​ខែ​មុន និង​ជា​លើក​ទី ១៨ ចាប់តាំងពី​ដើមឆ្នាំ ២០២២ មក ។

ទីភ្នាក់ងារនេះក៏បានកត់សម្គាល់ផងដែរថា ការបាញ់បង្ហោះនេះបានកើតឡើងរយៈពេល ២ ថ្ងៃ បន្ទាប់ពីកូរ៉េខាងជើង និងសហរដ្ឋអាមេរិកបានបញ្ចប់សមយុទ្ធយោធារយៈពេល ៣ ថ្ងៃនៅក្នុងដែនទឹកអន្តរជាតិក្បែរកោះ Okinawa ដឹកនាំដោយនាវាចម្បាំង USS Ronald Reagan ដែលជានាវាផ្ទុកយន្តហោះដើរដោយថាមពលនុយក្លេអ៊ែរ ។

គួរបញ្ជាក់ថា បើទោះជាកូរ៉េខាងជើងកំពុងផ្ទុះឆ្លងជំងឺគ្រុនក្ដៅនៅក្នុងប្រទេសក៏ដោយ ប៉ុន្តែការបាញ់សាកល្បងមីស៊ីលផ្លោងថ្មីៗនៅតែបន្តកើតមានជាហូរហែ ខណៈវាត្រូវបានគេមើលឃើញថាការគំរាមកំហែងទៅកាន់សហរដ្ឋអាមេរិក និងកូរ៉េខាងត្បូងជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ មន្ត្រី UN ថា សង្រ្គាម រុស្ស៊ី-អ៊ុយក្រែន នឹងគ្មានអ្នកឈ្នះឡើយចុចអាន ៖ មន្ត្រី UN ថា សង្រ្គាម រុស្ស៊ី-អ៊ុយក្រែន នឹងគ្មានអ្នកឈ្នះឡើយ