មន្ត្រី UN ថា សង្រ្គាម រុស្ស៊ី-អ៊ុយក្រែន នឹងគ្មានអ្នកឈ្នះឡើយ

អ្នកសម្របសម្រួលវិបត្តិរបស់អង្គការសហប្រជាជាតិសម្រាប់អ៊ុយក្រែនបានព្រមានថា នឹងគ្មានអ្នកឈ្នះឡើយក្នុងសង្គ្រាមលុកលុយរបស់រុស្ស៊ីលើអ៊ុយក្រែន ខណៈដែលជម្លោះបានឈានចូលដល់ជាង ១០០ ថ្ងៃហើយ ។

លោក Amin Awad ដែលបម្រើការជាជំនួយការនៅស្ថាប័នពិភពលោកបាននិយាយនៅក្នុងសេចក្តីថ្លែងការណ៍មួយថា “សង្រ្គាមនេះគឺកំពុងកើតឡើងមែន ប៉ុន្តែនឹងគ្មានអ្នកឈ្នះនោះទេ ។ ដូចដែលយើងបានធ្វើជាសាក្សីក្នុងរយៈពេលជាង ១០០ ថ្ងៃមកនេះ មានការបាត់បង់ដូចជា ជីវិត ផ្ទះ ការងារ និងអនាគតជាច្រើន” ។

លោកបញ្ជាក់ថា “សង្រ្គាមនេះបានធ្វើឲ្យបាត់បង់ជីវិតមនុស្សមិនអាចទទួលយកបាន ហើយបានលេបត្របាក់ស្ទើរតែគ្រប់ទិដ្ឋភាពនៃជីវិតស៊ីវិល ។ យើងបានឃើញការបំផ្លិចបំផ្លាញ និងការហិនហោចនៅទូទាំងទីក្រុង ទីប្រជុំជន និងភូមិនានាជាដើម ខណៈសាលារៀន មន្ទីរពេទ្យ និង​ជម្រក​អាចនៅប្រើប្រាស់បាន ។

ជាចុងក្រោយលោក Amin Awad បញ្ជាក់ថា “កិច្ចខិតខំប្រឹងប្រែងមិនចេះនឿយហត់របស់យើងគឺដើម្បីឆ្លើយតបទៅនឹងផលប៉ះពាល់ដ៏សាហាវនៃសង្រ្គាមដែលកំពុងបន្ត ហើយអ្វីដែលសំខាន់ជាងនេះទៅទៀតនោះគឺយើងត្រូវការសន្តិភាព ហើយសង្គ្រាម​ត្រូវ​តែ​បញ្ចប់​នៅ​ពេល​នេះ“ ។

យោងតាមការប៉ាន់ប្រមាណរបស់អង្គការសហប្រជាជាតិបានឲ្យដឹងថា យ៉ាងហោចណាស់ជនស៊ីវិល ៤,១១៣ នាក់បានស្លាប់ និង ៤,៩១៦ នាក់បានរងរបួសនៅក្នុងប្រទេសអ៊ុយក្រែន ចាប់តាំងពីផ្ទុះសង្រ្គាមឡើង ខណៈចំនួនពិតប្រាកដត្រូវបានគេជឿថានឹងមានច្រើនជាងនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Times Now

ចុចអាន ៖ រុស្ស៊ី ថា អាមេរិក ចង់ប្រែ អ៊ុយក្រែន ជាប្រទេសអាណានិគមរបស់ខ្លួន

ចុចអាន ៖ អង់គ្លេស ថា រុស្ស៊ី នឹងប្រើពេល ២ សប្ដាហ៍ប៉ុណ្ណោះគ្រប់គ្រងទីក្រុងមួយនេះ