ព័ត៌មានអន្ដរជាតិ

កូរ៉េខាងត្បូង៖ កូរ៉េខាងជើង បានបញ្ជូនទ័ពបន្ថែមចំនួន ៣ ០០០នាក់ទៅរុស្ស៊ី នៅដើមឆ្នាំនេះ

បានផុស

១ year មុន

នៅ

ថ្ងៃព្រហស្បតិ៍ ២៧ មីនា ២០២៥

ដោយ

Chheang

អគ្គសេនាធិការចម្រុះរបស់កូរ៉េខាងត្បូង (JCS) បានរាយការណ៍នៅថ្ងៃព្រហស្បតិ៍ទី២៧ខែមីនានេះថា កូរ៉េខាងជើងបានដាក់ពង្រាយទាហានប្រមាណ ៣ ០០០នាក់ទៅកាន់ប្រទេសរុស្ស៊ីកាលពីដើមឆ្នាំនេះ ដើម្បីគាំទ្រការធ្វើសង្គ្រាមរបស់ទីក្រុងមូស្គូនៅអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

JCS បានឲ្យដឹងថា ទាហានទាំងនោះត្រូវបានបញ្ជូនជាដំណាក់កាលនៅចន្លោះពីខែមករាដល់ខែកុម្ភៈឆ្នាំ២០២៥ ហើយការដាក់ពង្រាយបន្ថែមទំនងជាកើតមានបន្តទៀត។ កងទ័ពទាំងនេះត្រូវបានគេជឿថាកំពុងផ្តល់ការគាំទ្រផ្នែកភស្តុភារ ដូចជា ការដឹកជញ្ជូនគ្រាប់រំសេវ និងការថែទាំសម្ភារៈបរិក្ខារ ជាជាងតួនាទីប្រយុទ្ធដោយផ្ទាល់។

ក្រៅតែពីការដាក់ពង្រាយទាហាន កូរ៉េខាងជើងក៏បានបញ្ជូនសព្វាវុធឲ្យទៅរុស្ស៊ីផងដែរ ដូចជា គ្រាប់មីស៊ីលប៉ាលិស្ទិករយៈចម្ងាយខ្លី គ្រាប់រំសេវ ឧបករណ៍បាញ់កាំភ្លើងធំទំហំ១៧០មិល្លិម៉ែត្រ និងឧបករណ៍បាញ់រ៉ុកកែត ជាដើម។

JCS បានបញ្ជាក់ថា ទាហានកូរ៉េខាងជើងចំនួន ៤ ០០០នាក់ បានរងរបួស និងស្លាប់ នៅក្នុងចំណោមទាហាន ១១ ០០០នាក់ដែលខ្លួនបានបញ្ជូនទៅប្រទេសរុស្ស៊ីកាលពីឆ្នាំមុន។

ការផ្លាស់ប្តូរនេះបង្ហាញពីការពង្រឹងទំនាក់ទំនងយោធាកាន់តែជិតស្និទ្ធរវាងទីក្រុងព្យុងយ៉ាង និងទីក្រុងមូស្គូ ក្នុងរយៈពេលប៉ុន្មានខែថ្មីៗនេះ តាមរយៈការផ្ទេរអាវុធ និងកិច្ចព្រមព្រៀងការពារគ្នាទៅវិញទៅមក។ យោធាកូរ៉េខាងត្បូងបន្តតាមដានស្ថានការណ៍យ៉ាងដិតដល់ ដោយព្រមានពីផលប៉ះពាល់សន្តិសុខដែលអាចកើតមាន៕

ដោយ៖ ឈាង