រុស្ស៊ី យល់​ព្រម​ជួយ​ធ្វើ​ទំនើបកម្ម​វិស័យ​វេជ្ជសាស្ត្រ​របស់​កូរ៉េ​ខាង​ជើង

ប្រទេសរុស្ស៊ី បានយល់ព្រមបន្តធ្វើជាម្ចាស់ផ្ទះទទួលវេជ្ជបណ្ឌិតកូរ៉េខាងជើងសម្រាប់កម្មសិក្សានៅមន្ទីរពេទ្យនាំមុខគេនៅទីក្រុងមូស្គូ និងជួយក្រុងព្យុងយ៉ាងក្នុងការធ្វើទំនើបកម្មឧស្សាហកម្មឱសថរបស់ខ្លួន រួមទាំងការផលិតថ្នាំអង់ទីប៊ីយោទិចផងដែរ។

កិច្ចព្រមព្រៀងនេះត្រូវបានលាតត្រដាងនៅលើទំព័រហ្វេសប៊ុក​របស់ស្ថានទូតរុស្ស៊ីប្រចាំទីក្រុងព្យុងយ៉ាងកាល​ពី​ថ្ងៃ​អង្គារ​ទី​២៥​ខែ​មីនា​ឆ្នាំ​២០២៥ បន្ទាប់ពីជំនួបរវាងឯកអគ្គរដ្ឋទូតរុស្ស៊ី​លោក Alexandr Matsegora និងអនុរដ្ឋមន្ត្រីសុខាភិបាលកូរ៉េខាងជើងលោក Jon Sol-ryong។

លោក Jon បានត្រឡប់ទៅប្រទេសកូរ៉េខាងជើងវិញកាលពីថ្ងៃចន្ទ បន្ទាប់ពីដឹកនាំគណៈប្រតិភូ​ទៅកាន់ប្រទេសរុស្ស៊ី ដើម្បីពិភាក្សាអំពីកិច្ចសហប្រតិបត្តិការទ្វេភាគីលើវិស័យសុខភាពសាធារណៈ។

ក្នុងអំឡុងពេលនៃដំណើរទស្សនកិច្ចនេះ រុស្ស៊ីបានយល់ព្រមអនុញ្ញាត​ឲ្យ​វេជ្ជបណ្ឌិតកូរ៉េខាងជើងបន្តការបណ្តុះបណ្តាលនៅមជ្ឈមណ្ឌលវេជ្ជសាស្ត្រកំពូលនៅទីក្រុងមូស្គូ ដែលមានឯកទេសលើមុខជំនាញដូចជា ជំងឺបេះដូង និងមហារីក។ បន្ថែមពីលើនេះ ទីក្រុងមូស្គូបានសន្យាគាំទ្រដល់ការធ្វើ​ឲ្យ​ប្រសើរឡើងនូវការផលិតឱសថរបស់​កូរ៉េខាងជើង ជាពិសេសក្នុងការអភិវឌ្ឍ​ថ្នាំអង់ទីប៊ីយោទិចទំនើប។

ជំនួប​​នេះ​ក៏​បាន​ពិភាក្សា​អំពី​ផែនការបង្កើតស្ថាប័នវេជ្ជសាស្ត្រថ្មី​មួយ​នៅ​លើ​​ទឹក​ដី​កូរ៉េខាងជើង​ផង​ដែរ ដោយទីក្រុងព្យុងយ៉ាងបានបង្ហាញពីឆន្ទៈ​ក្នុងការចែករំលែកព័ត៌មានអំពីថ្នាំរបស់ខ្លួន។ ភាគីទាំងពីរបានឯកភាពរក្សាទំនាក់ទំនង ដើម្បីអនុវត្តគំនិតផ្តួចផ្តើមទាំងនេះ៕

ដោយ៖ ឈាង